თბილისის საქალაქო სასამართლომ ფაშისტური მოძრაობის, საქართველოს ეროვნული ერთობის ლიდერს, გიორგი ჭელიძეს აღკვეთის ღონისძიების სახით პატიმრობა შეუფარდა. გადაწყვეტილება სასამართლომ დღეს, 3 სექტემბერს, რამდენიმე წუთის წინ მიიღო.

შინაგან საქმეთა სამინისტომ ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით გიორგი ჭელიძე პირველ სექტემბერს დააკავა. განცხადების მიხედვით, პოლიციამ ბრალდებულის საცხოვრებელი ბინის ჩხრეკისას სხვადასხვა ტიპის იარაღი და 28 ვაზნა ნივთმტკიცებად ამოიღო.

მიმდინარე წლის 31 აგვისტოს, სამართალდამცველებმა გამოძიება სოციალურ ქსელში მოძრაობა საქართველოს ეროვნული ერთობის გვერდზე გავრცელებული ვიდეოს საფუძველზე დაიწყეს. ვიდეოში, რომელიც ფაშისტურმა დაჯგუფებამ სოციალურ ქსელში გაავრცელა, ჩანს თუ როგორ ვარჯიშობენ იარაღის სროლაში ორგანიზაციის აქტივისტები.

ჭელიძის დაკავების შემდეგ ფაშისტური მოძრაობის ფეისბუქგვერდი წაიშალა. სწორედ აღნიშნულ გვერდზე გამოქვეყნებული ვიდეოების საფუძველზე დაიწყო შსს-მ გამოძიება.