ქართველმა ჩოგბურთელი წარმატებულ სვლას განაგრძობს: ამჯერად მან დაძაბულ ბრძოლაში ესპანელ გვიდო პელას აჯობა (6:3, 6:4, 1:6, 7:6 (7:4) და US Open-ის მერვედფინალში გავიდა. ამის შესახებ ინფორმაცია adjarasport-მა გაავრცელა.

გამოცემის ცნობით, მატჩის პირველი 2 სეტი ჩვენი თანამემამულის გამარჯვებით დასრულდა. მესამე სეტში ესპანელმა იმარჯვა, მეოთხე კი ბასილაშვილმა ტაი-ბრეიკზე თავის სასარგებლოდ დაასრულა და მომდევნო ეტაპზე თამაშის უფლება მოიპოვა.

ბასილაშვილი ტურნირზე პირველი წრიდან ჩაერთო, სადაც მან სლოვენიელი ალიაზ ბედენე 5 სეტში დაამარცხა. მეორე წრეში კი ჩვენებურმა ამერიკელ ჯეკ სოკს სძლია (6:4, 3:6, 2:6, 6:7).

ამ მატჩამდე, აღნიშნულ ტურნირზე ნიკამ $156 000 გამოიმუშავა, დღევანდელი მოგებით კი მის მონაგარი $266 000-მდე გაიზრდება. მსოფლიო რეიტინგში აქამდე ნიკა 37-ე ადგილს იკავებდა, ამ გამარჯვების შემდეგ კი იგი 31-ე ადგილამდე აღზევდა, რაც მისი კარიერის საუკეთესო შედეგია.