"ძალიან მწყდება გული, რომ ეს კონსენსუსი ვერ მოხერხდა, და უფრო მეტიც, კონსენსუსისაკენ ნაბიჯიც არ გადაიდგა", - საქართველოს პრეზიდენტმა, გიორგი მარგველაშვილმა უზენაესი სასამართლოს თავმჯდომარის კანდიდატურის ვერ შერჩევაზე, დღეს 31 აგვისტოს კიდევ ერთხელ ისაუბრა.

მარგველაშვილის თქმით, კონსენსუსის შემთხვევაში პარლამენტში უზენაესი სასამართლოს თავმჯდომარეობის ძლიერ კანდიდატს წარადგენდნენ.

"კონსენსუსის შემთხვევაში ჩვენ ნამდვილად გვექნებოდა ძალა, რომ ძლიერი კანდიდატი წარგვედგინა პარლამენტში, საზოგადოების მიერ მხარდაჭერილი და მისი ჩაგდება არ იქნებოდა იოლი", - აღნიშნა გიორგი მარგველაშვილმა.

მანვე განმარტა, რომ მისთვის გაუგებარია, რატომ ჩააგდეს არასამთავრობო სექტორმა და ექსპერტებმა კანდიდატურის შერჩევის პროცესი და მისი შეთავაზების მიუხედავად არ დააფიქსირეს საკუთარი პოზიცია.

"მე შევთავაზე ქართულ იურიდიულ საზოგადოებას გამოევლინათ საუკეთესო კანდიდატი და ვთქვი, რომ მე მხარს დავუჭერ მათ კანდიდატს. ეს ღიად ვუთხარი იმ ადამიანებს, ვინც ძალიან ხშირად ტელევიზიით აკრიტიკებს სასამართლო სისტემას, გულისტკივილით საუბრობს სირთულეებზე, ვინც სხვადასხვა კომისიებში მიიღწვის მონაწილეობის მისაღებად და ყურადღებას თუ არ მიაქცევენ ძალიან აღშფოთებულები არიან, რომ მათი აზრი არ გაითვალისწინეს".

პრეზიდენტის თქმით, მათ ამ პროცესში ამ ფორმით მონაწილეობა არ სურდათ, რაც მისთვის გაუგებარია.

"დღეს რომ ვინმე დავასახელო, ასეთი მხარდაჭერის გარეშე, თუ მას არ ექნება საზოგადოების მხარდაჭერა, როდესაც ღიად არის ნათქვამი, რომ ჩემს კანდიდატს არ განიხილავს საკონსტიტუციო უმრავლესობის მქონე მმართველი პარტია, რომელმაც არც განიხილა ჩემი წარდგენილი სხვა კანდიდატები, ეს იქნება დასახელება დასახელებისთვის".

მას შემდეგ, რაც უზენაესი სასამართლოს თავმჯდომარე ნინო გვენეტაძე გადადგა, პრეზიდენტმა მარგველაშვილმა განაცხადა, რომ ის იწყებდა ფართო კონსულტაციებს, რომელიც მოიცავდა გახსნილ დემოკრატიულ ჩართულობას.

უზენაესი სასამართლოს თავმჯდომარის კანდიდატის შერჩევის პროცესში კონსენსუსი რომ ვერ შედგა, 24 აგვისტოს გახდა ცნობილი. მაშინ პრეზიდენტის ადმინისტრაციის ხელმძღვანელმა კანდიდატურის არდასახელების იდენტურ მიზეზებზე ისაუბრა.