უზენაესი სასამართლოს თავმჯდომარის კანდიდატს პრეზიდენტი გიორგი მარგველაშვილი აღარ წარადგენს, ამ თემაზე კონსენსუსი ვერ შედგა. ამის შესახებ საქართველოს პრეზიდენტის ადმინისტრაციის უფროსმა, გიორგი აბაშიშვილმა დღეს, 24 აგვისტოს ჟურნალისტებთან ისაუბრა.

მისი თქმით, ფართო კონსენსუსის გარეშე, კანდიდატურის დასახელება იქნებოდა დასახელება დასახელებისთვის, კანდიდატურა კანდიდატურისთვის და არა შედეგზე ორიენტირებული.

"იმ ფონზე, როდესაც "ქართული ოცნება" ღიად აცხადებდა, რომ ის არ მიიღებდა კონსულტაციებში მონაწილეობას, ანუ პარლამენტში კანდიდატურის დამტკიცების ერთადერთი შესაძლებლობა იყო ფართო კონსენსუსი. სამწუხაროდ, ეს ფართო კონსენსუსი ვერ მოხერხდა. მინდა შეგახსენოთ, რომ დღესაც საქართველოს პარლამენტში წარდგენილია მოსამართლეობის რამდენიმე კანდიდატურა, რომლებსაც საქართველოს პარლამენტი არც კი განიხილავს. ასე რომ, კონსენსუსი ამ ეტაპზე ვერ შედგა".

მას შემდეგ რაც უზენაესი სასამართლოს თავმჯდომარე ნინო გვენეტაძე გადადგა, პრეზიდენტმა მარგველაშვილმა განაცხადა, რომ ის იწყებდა ფართო კონსულტაციებს, რომელიც მოიცავდა გახსნილ დემოკრატიულ ჩართულობას.

პრეზიდენტის თქმით, უზენაესი სასამართლოს ის წარადგენს არა როგორც პრეზიდენტი, არამედ აპირებს ამ პროცესში მთელი საზოგადოება ჩართოს.

პრეზიდენტმა მოუწოდა ყველას, მათ შორის აკადემიური სფეროს წარმომადგენლებს, ჩაერთონ შერჩევის პროცესში.

როგორც უზენაესი სასამართლოს განცხადებაშია ნათქვამი, ნინო გვენეტაძის გადადგომა ჯანმრთელობის მდგომარეობას უკვაშირდება, რომელიც საზღვარგარეთ რამდენიმეთვიან მკურნალობას მოითხოვს.