UEFA-მ გურამ კაშია ოფიციალურად დააჯილდოვა. დაჯილდოების ცერემონიაზე წამყვანმა ისაუბრა იმაზე, რომ #EqualGame-ის ჯილდო კაშიამ ლგბტ თემის მხარდაჭერისთვის მიიღო. მან აღნიშნა, რომ კაშიას ლგბტ სამკლაურით თამაშს საქართველოში კრიტიკა მოჰყვა, მაგრამ ფეხბურთელმა უკან არ დაიხია და განაცხადა, რომ თანასწორობის უფლებას დაიცავს.

ფოტო: კადრი ვიდეოდან / UEFA

გურამ კაშიას ჯილდო ლევან კობიაშვილმა აიღო, რადგან კაშია დაჯილდოების ცერემონიას თამაშის გამო ვერ დაესწრო. ცერემონიაზე კაშიას ვიდეო გაუშვეს, სადაც მან მადლობა გადაუხადა უეფას ჯილდოსთვის.

კაშიამ აღნიშნა, რომ ეს ბევრს ნიშნავს მისთვის, მისი ოჯახისთვის და მისი ქვეყნისთვის. ფეხბურთელმა განაცხადა, რომ ის მხარს დაუჭერს თანასწორობას და ადამიანის უფლებებს.

#EqualGame უეფას ახალი ჯილდოა, რომელიც პირველად გურამ კაშიას გადაეცა. ქართველმა ფეხბურთელმა ჯილდო ლგბტ თემის მიმართ გამოხატული მხარდაჭერისთვის მიიღო.

გასული წლის ოქტომბერში, კაშიამ მატჩისას ხელზე ლგბტ დროშის ფერებში სამკლაური გაიკეთა, რაც ცნობიერების ამაღლების კამპანიის ნაწილია. მისი ფოტოს გამოჩენამ, ქართველი მომხმარებლების ნაწილი გააღიზიანა. კაშიამ განაცხადა, რომ ძალადობის წინააღმდეგია და არ ნანობს რაც გააკეთა.

მოგვიანებით, ონლაინ ბულინგის გამო ფეხბურთელმა ფეისბუქის ვერიფიცირებული გვერდი გააუქმა და ინსტაგრამის ანგარიში დახურა. სოციალური ქსელის მომხმარებლები მის მხარდაჭერად გაერთიანდნენ და კამპანია #გურამშენთანვარ დაიწყეს.

კაშიას მხარდაჭერა გამოუცხადა ფეხბურთის ფედერაციამ, თანაგუნდელებმა, ომგუდმსნემა პოლიტიკოსებმა, ჟურნალისტებმა და სხვადასხვა აქტივისტებმა.

თუმცა ამავე მიზეზით, ჰომოფობიურ ნიადაგზე კაშიას მიმართ მუქარის ბრალდები გაგრძელდა. ულტრამემარჯვენე ჯგუფები 9 სექტემბერ ნაკრების თამაშზე კაშიას წინააღმდეგ საპროტესტო აქციას გეგმავენ. თამაშზევე გაიმართება ფეხბურთელის მხარდამჭერი აქციაც.