განათლების, მეცნიერების, კულტურისა და სპორტის მინისტრმა, მიხელ ბატიაშვილმა განაცხადა, რომ ნაკრების ფეხბურთელის, გურამ კაშიას საქმეს არ იცნობს, მაგრამ დაინტერესდება. მინისტრის განცხადებას პირველი არხი ავრცელებს.

"სამწუხაროდ, დეტალურად და სიღრმისეულად არ ვიცი ამ პრობლემის შესახებ, მაგრამ დავინტერესდები და მზად ვიქნები, რომ გიპასუხოთ".

ქართული მარშის ერთ-ერთი წევრი კონსტანტინე მორგოშია გურამ კაშიას საქმეზე შსს-ში გამოკითხვაზე დაიბარეს. გუშინ, 28 აგვისტოს მორგოშიამ გურამ კაშიაზე ჰომოფობიური შინაარსისა და მუქარის შემცველი სტატუსი დაწერა.

"შენ ჩამოდი 9 სექტემბერს თბილისში და დანარჩენს კი ნახავ..." - ეწერა მორგოშიას.

9 სექტემბერს საქართველოს ეროვნული ნაკრები საღამოს რვა საათზე დინამო არენაზე ლატვიას ეთამაშება.

კაშიას მხარდასაჭერად სოციალურ ქსელებში კამპანია #გურამშენთანვართ მას შემდეგ დაიწო, რაც კაშიამ ვერიფიცირებული ფეისბუქგვერდი გააუქმა და ინსტაგრამის ანგარიში დახურა.

ინსტაგრამის სთორიში გურამ კაშიამ დაწერა: "სანამ ერთი გულშემატკივარი მაინც მეყოლება ჩვენც ქვეყანაში, იმ ადამიანებისთვის გამოვცხადდები ნაკრებში"

ინსტაგრამის სთორიში ქვეყნდება პოსტები ჰეშთეგით #გურამშენთანვართ და @37GK, რაც კაშიას ინსტაგრამის მისამართია. ფეისბუქის მომხმარებლები კი მხარდასაჭერად ჩარჩოს იყენებენ. ჩარჩოს საკუთარ პროფილზე დასაყენებლად, დააკლიკეთ აქ.

ამავე კამპანიის ფარგლებში კაშიას მხარდაჭერა გამოუცხადა ფეხბურთის ფედერაციის პრეზიდენტმა და ვიცე-პრეზიდენტმა, კლუბ ჩიხურას დირექტორმა, ნაკრების ფეხბურთელებმა, გიორგი მერებაშვილმა, გიორგი ლორიამ, ნიკა კეკვესკირმა და გიორგი ქვილითაიამ. კაშიას მხარდაჭერა გამოუცხადეს ქართული სპორტის ქომაგებმაც.

გასული წლის ოქტომბერში, ფეისბუკზე კაშიას ფოტოს გამოჩნდა, რომელზეც თამაშის დროს, ლგბტ დროშის ფერებში სამკლაური უკეთია. ფოტომ ქართველი მომხმარებლების ნაწილი გააღიზიანა.

რამდენიმე დღის წინ ცნობილი გახდა, რომ უეფა გურამ კაშიას ლგბტ თემის მიმართ გამოხატული მხარდაჭერისთვის დააჯილდოებს. #EqualGame უეფას ახალი ჯილდოა, რომელიც პირველად ქართველ ფეხბურთელს გადაეცა.

გურამ კაშიამ უეფასთან საუბარში განაცხადა, რომ ამ ჯილდოს მიღების გამო ძალიან ამაყობს.

"ვამაყობ, რომ უეფამ #EqualGame-ის ჯილდო მე გადმომცა. მე მჯერა, რომ ყველა ადამიანი თანასწორია, განურჩევლად იმისა, თუ რისი გწამს, ვინ გიყვარს და რას წარმოადგენ... მადლობა უეფას პრეზიდენტს ამ ჯილდოსთვის. სადაც არ უნდა ვითამაშო, ყოველთვის გავაგრძელებ თანასწორობის უფლებების დაცვას", - ამბობს კაშია.