საქართველოს საგარეო საქმეთა მინისტრმა, დავით ზალკალიანმა ჟურნალისტებთან საუბრისას განაცხადა, რომ ოკუპირებულ ტერიტორიებთან დაკავშირებით მერკელს მკაფიო გზავნილი ჰქონდა.

"ანგელა მერკელმა მკაფიოდ აღნიშნა, რომ უნდა დასრულდეს ის უსამართლობა და უკანონობა, რომელსაც ადგილი აქვს ოკუპირებულ ტერიტორიებზე. მან აღნიშნა, რომ მუდმივად ახსოვთ საქართველო და რომ ის მუდმივად საუბრობს საქართველოს პრობლემატიკის შესახებ და ოკუპირებულ ტერიტორიებზე შექმნილ სიტუაციასთან დაკავშირებით ყველა ფორუმზე, მათ შორის სხვა ქვეყნებთან ორმხრივი ურთიერთობების ფორმატში", – განაცხადა დავით ზალკალიანმა.

საგარეო საქმეთა მინისტრმა ხაზი გაუსვა საოკუპაციო ხაზთან გერმანიის კანცლერის ხვალინდელი ვიზიტის მნიშვნელობას. მისი თქმით, ეს არის მკაფიო გზავნილი, რომ გერმანია არ შეეგუება საქართველოს ოკუპაციას და ტერიტორიული მთლიანობის დარღვევას.

ანგელა მერკელი საქართველოს დღეს, 23 აგვისტოს ეწვია. მან ოფიციალური შეხვედრა გამართა პრემიერ მინისტრთან და საქართველოს პრეზიდენტთან. საქართველოს მთავრობის ადმინისტრაციაში გამართულ პრესკონფერენციაზე მერკელმა განაცხადა, რომ მხარს უჭერს საქართველოს ტერიტორიულ მთალიანობას და რუსეთის პოლიტიკა საქართველოს მიმართ უსამართლობაა.

ხვალ, 24 აგვისტოს ის საოკუპაციო ხაზთან ევროკავშირის დელეგაციას შეხვდება. მერკელი საოკუპაციო ხაზთან საქართველოს მთავრობის წარმომადგენლების გარეშე მივა და შეხვედრა მედიისთვის დახურული იქნება.

გერმანიის კანცლერის ვიზიტის სრული განრიგი იხილეთ აქ.

გაიგეთ მეტი: