“მე მხარს ვუჭერ საქართველოს ტერიტორიულ მთლიანობას“, - განაცხადა გერმანიის კანცლერმა, ანგელა მერკელმა საქართველოს მთავრობის ადმინისტრაციაში გამართულ პრესკონფერენციაზე.

მერკელმა აღნიშნა, რომ საქართველოში 10 წლის წინ, 2008 წლის აგვისტოს ომის შემდეგ იმყოფებოდა. მისი თქმით, მაშინ მკაფიოდ მოითხოვა რუსეთის ჯარის გაყვანა საქართველოს ტერიტორიიდან და ამ დრომდე მხარს უჭერს საქართველოს სუვერენიტეტს.

მერკელს არ უსაუბრია რუსულ ოკუპაციასა და ოკუპირებულ ტერიტორიებზე, თუმცა ხვალ, 24 აგვისტოს ის საოკუპაციო ხაზთან ევროკავშირის დელეგაციას შეხვდება. მერკელი საოკუპაციო ხაზთან საქართველოს მთავრობის წარმომადგენლების გარეშე მივა და შეხვედრა მედიისთვის დახურული იქნება.

მერკელის სიტყვამდე საქართველოს პრემიერ მინისტრმა, მამუკა ბახტაძემ აღნიშნა, რომ მას საქართველოში არსებულ ვითარებასა კონფლიქტის მშვიდობიანად მოგვარებაზე ესაუბრა. ბახტაძემ აღნიშნა, რომ რუსეთი არ ასრულებს ცეცხლის შეწყვეტის შეთანხმებით ნაკისრ ვალდებულებებს და აგრძელებს საქართველოს ოკუპაციას.

ანგელა მერკელი საქართველოს ორდღიანი ოფიციალური ვიზიტით დღეს ესტუმრა. კანცლერის თვითმფრინავი თბილისის საერთაშორისო აეროპორტშოი 15:20 საათზე დაეშვა. მას აეროპორტში საქართველოს საგარეო საქმეთა მინისტრი დავით ზალკალიანი დახვდა.

გერმანიის კანცლერის ვიზიტის სრული განრიგი იხილეთ აქ.