გერმანიის კანცლერი, ანგელა მერკელი საქართველოში ორდღიანი ვიზიტის ფარგლებში საოკუპაციო ხაზთან ჩავა, თუმცა ვიზიტის ეს კომპონენტი მედიისთვის დახურული იქნება.

განრიგის თანახმად, კანცლერი საოკუპაციო ხაზთან 24 აგვისტოს მივა და იქ ევროკავშირის სადამკვირვებლო მისიის წარმომადგენლებს შეხვდება.

საგარეო საქმეთა სამინისტროს პრესსამსახურში On.ge-ს განუცხადეს, რომ ევროკავშირის სადამკვირვებლო მისია, მოგვიანებით გაავრცელებს ადგილზე მისვლის ფოტომასალას.

საპარლამენტო უმრავლესობის დეპუტატმა, დიმიტრი ცქიტიშვილმა ტვ პირველის ეთერში კითხვაზე, თუ რატომ დაიხურა ეს ნაწილი და უკავშირდება თუ არა უსაფრთხოების ზომებს, უპასუხა, რომ ეს ფორმატი შესაბამისი მისიის მიერ არის გადაწყვეტილი და განსაკუთრებული პოლიტიკური დატვირთვა არ აქვს:

"ეს არის ფორმატი, გარკვეული პროტოკოლური ნაბიჯები".

დღეს, 23 აგვისტოს გერმანიის კანცლერის ვიზიტი იწყება საქართველოში. თბილისის საერთაშორისო აეროპორტში მას საქართველოს საგარეო საგარეო საქმეთა მინისტრი დავით ზალკალიანი დახვდება, რის შემდეგაც დახვედრის ოფიციალური ცერემონია და ერთობლივი პრესკონფერენცია მთავრობის ადმინისტრაციაში გაიმართება.

გერმანიის კანცლერის ვიზიტის სრული განრიგი იხილეთ აქ.