ქუთაისის საერთაშორისო აეროპორტში დიდი ოდენობით არადეკლარირებული ოქროს ნაკეთობების შეტანის ბრალდებით სამი პირი დააკავეს.

ფინანსთა სამინისტროს შემოსავლების სამსახურის ინფორმაციით, გამშვებ პუნქტში მებაჟე ოფიცრებმა სამ პირს ფიზიკური და კუთვნილი ხელბარგების დათვალიერების შედეგად 592,41 გრამი არადეკლარირებული ოქრო ამოუღეს. მათივე ინფორმაციით, ნაკეთობათა საერთო ღირებულება 61 767 ლარია.

უწყების ცნობით, შემდგომი რეაგირების მიზნით საქმე ფინანსთა სამინისტროს საგამოძიებო სამსახურს გადაეცა.