შინაგან საქმეთა სამინისტრომ დიდი ოდენობით ქონების მიღების მიზნით ჩადენილი გამოძალვის ბრალდებით ბათუმში ორი პირი დააკავა.

უწყების ვერსიით, აღნიშნულმა პირებმა თურქეთის რესპუბლიკის მოქალაქე საქართველოში მოტყუებით ჩამოიყვანეს, ბათუმში, ნაქირავებ ბინაში წაიყვანეს და ფიზიკური და სიტყვიერი შეურაცხყოფა მიაყენეს.

შსს-ს ინფორმაციით, ბრალდებულები სახელის გამტეხი ცნობების გავრცელებით, ასევე ძალადობითა და მუქარით თურქეთის მოქალაქისგან დიდი ოდენობის თანხას ითხოვნდნენ. როგორც შსს-ს განცხადებაში წერია, თურქეთის მოქალაქემ მათ 10 000 ლირა გადასცა, რის შემდეგაც ბრალდებულებმა დაზარალებულისა და მისი მეუღლის ბარათებიდან 1 500 ლარი მიითვისეს. უწყების ცნობით, თანხის გამოძალვის შემდეგ დაკავებულებმა თურქეთის მოქალაქე სარფში დატოვეს, რათა მას საქართველო დაეტოვებინა.

შსს-მ ბრალდებულთაგან ერთი ბორჯომში, მეორე კი კახეთში დააკავა. ერთ-ერთი ბრალდებული იძებნება და მას ბრალი დაუსწრებლად წარედგინა.

საქმეზე გამოძიება საქართველოს სისხლის სამართლის კოდექსის 181-ე მუხლის მე-2 ნაწილის "ა" და "გ" ქვეპუნქტებით მიმდინარეობს. აღნიშნული მუხლით ჯგუფურად ჩადენილი გამოძალვა, რასაც ერთვის დაზარალებულის ან მისი ახლო ნათესავის მიმართ ძალადობა, მუქარა, სახელის გამტეხი ცნობის გავრცელება ან ნივთის დაზიანება, 4-დან 7 წლამდე ვადით თავისუფლების აღკვეთას ითვალისწინებს.