მას შემდეგ, რაც 31 ივლისს ერევანში შეიარაღებული თავდამსხმელები ხელისუფლებას ჩაბარდნენ, სომხეთის დედაქალაქში აქციები არ წყდება. გასულ ღამეს აქციაში მონაწილე 27 პირი საზოგადოებრივი წესრიგის ბრალდებით დააკავეს, თუმცა მოგვიანებით გაათავისუფლეს. ინფორმაციას News.am ავრცელებს.

გარდა ამისა, სომხეთის პრეზიდენტის, სერჟ სარგისიანის ბრძანებით, ეროვნული უშიშროების სამსახურის დირექტორის პირველი მოადგილე, გრანტ ეპისკოპოსიანი თანამდებობიდან გაათავისუფლეს.

ამასთან, ადგილობრივი მედია იტყობინება, რომ ასევე გუშინ ღამით ოპოზიციური მოძრაობის - დამფუძნებელთა პარლამენტის ერთ-ერთ წევრს, არუტიონ აგლამაზიანს თავის საცხოვრებელ სახლთან სასტიკად სცემეს. როგორც დაშავებულის მამა მედიასთან ყვება, მისი შვილი სახლში მიდიოდა, როდესაც მას თავს დაესხნენ. მისი თქმით, ის ახლა საავადმყოფოშია გადაყვანილი.

მიმდინარე მოვლენებთან დაკავშირებით, ადგილობრივი ომბუდსმენი, ლარისა ალავერდიანი განმარტავს, რომ მხოლოდ ხელისუფლებას აქვს ბერკეტი სიტუაციის განსამუხტად, თუმცა ის ისე მოქმედებს, რომ მოსახლეობაში რადიკალური განწყობა იქმენბა და, როგორც ჩანს, არ აპირებს მოქალაქეებთან დიალოგზე წასვლას:

"გასულ ღამესაც ჰქონდა დაკავებებს ადგილი, მაგრამ რისთვის? თუ ყველაფერი ასე გაგრძელდა, აუცილებლად გამოჩნდებიან ადამიანები, რომლებიც მიზნის მისაღწევად ისევ ეცდებიან კანონის გვერდის ავლით მოქმედებას".

17 ივლისს ოპოზიციურმა მოძრაობის - დამფუძნებელთა პარლამენტის მხარდამჭერმა შეიარაღებულმა ჯგუფმა - სასნა ცრერმა ერევანში, ერებუნის გარეუბანში, პოლიციის შენობა დაიკავა და მძევლები აიყვანა. მათ მთავარ მოთხოვნას წარმოადგენდა: დამფუძნებელთა პარლამენტის ლიდერის, ჟირაირა სეფილიანის გათავისუფლება, ქვეყნის პრეზიდენტის, სერჟ სარგისიანის გადადგომა, არჩევნების დანიშვნა და ძალაუფლების ხალხისთვის გადაცემა.

აღნიშნული ჯგუფის მხარდასაჭერად ერევანში პერმანენტული აქციების ციკლი დაიწყო, რომელიც მას შემდეგაც არ წყდება, რაც 31 ივლისს ამბოხებულებმა ბოლო მძევლები გაათავისუფლეს, პოლიციას ჩაბარდნენ და განაცხადეს:

"მისი შესრულებულია, რადგან აჯანყებას დავუდეთ სათავე".

17 ივლისს დაწყებული ამბოხის საქმეზე საგამოძიებო მოქმედებები სისხლის სამართლის კოდექსის შემდეგი მუხლებით მიმდინარეობს: მძევლების აყვანა, შენობის ან სატრანსორტო საშუალების უკანონოდ დაკავება, იარაღის უკანონო შეძენა-შენახვა-ტარება. ცნობილია, რომ აღნიშნულ საქმეზე დაკავებულებს ადვოკატების 12 კაციანი ჯგუფი უფასოდ დაიცავს.

უფრო მეტი იხილეთ აქ: