თავდაცვის ყოფილმა მინისტრმა მინდია ჯანელიძემ რუსთავი 2-თან საუბრისას სამხედრო ობიექტებიდან ინფორმაციის შესაძლო გაცემის საქმეზე განაცხადა, რომ ტრისტან წითელაშვილი არცერთ საიდუმლო აზაზე არ ყოფილა:

მისივე თქმით, აღნიშნული არ არის სისხლის სამართლის დანაშაული, ამიტომ მისი პროკურატურისთვის გადაცემა არასწორი იქნებოდა. მან განმარტა, რომ ეს იყო წესების დარღვევა, გადაცდომა, რაზეც გენერალურმა ინსპექციამ მოახდინა შესაბამისი რეაგირება.

"ეს გავს უფრო პოლიტიკურ სპეკულაციას, ვიდრე რამე საქმეზე ლაპარაკს, ამ თემაზე სერიოზული კომენტარის გაკეთება ძნელია. ვაცხადებ სრული პასუხისმგებლობით, რომ წითელაშვილი არ ყოფილა არცერთ საიდუმლო ბაზაზე და მეორე ბრალდება, რაც ჩემი მისამართით იყო, არის რომ თითქოს ვინმე დაუსჯელი დარჩა. ეს ასე არ ყოფილა. ჩემი მინისტრობის პერიოდში ვინც რაიმე გადაცდომა ჩაიდინა, ყველამ შესაბამისად აგო პასუხი. დანაშაულზე არ იყო საქმე, იყო გადაცდომაზე საქმე, ამ გადაცდომაზე აგო პასუხი იმ პირმა, ვინც ის ჩაიდინა. იყო სარეჟიმო წესების დარღვევა და ამ დარღვევაზე აგეს პასუხი".

გაერთიანებული შტაბის ყოფილი უფროსი, გენერალი გიგი კალანდაძე 31 ივლისის გადაცემა პოსტსკრიპტუმთან ინტერვიუში აცხადებს, რომ აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა.

კალანდაძე აზუსტებს ინტერვიუში, რომ საუბარია, იმ საცეცხლე წერტილებზე და ცენტრალური მართვის შტაბზე, რომელსაც რუსული აგრესიის შემთხვევაში, საქართველო მტრისაგან უნდა დაეცვა.

რუსთავი 2-ის მიერ მოპოვებული მასალის თანახმად, ტრისტან წითელაშვილი, რომელზეც გენერალური კალანდაძე საუბრობს, ყოფილი სამხედროა.

პოლკოვნიკი წითელაშვილი, 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს. 2013 წლის იანვარში, ხელისუფლებაში ქართული ოცნების მოსვლის შემდეგ მან ციხე დატოვა.

კალანდაძე ინტერვიუში ამტკიცებს რომ წითელაშვილი, საცეცხლე წერტილებზე მინდია ჯანელიძის მინისტრობის დროს დანიშნულმა, გენინსპექციის თანამშრომელმა გოდერძი ორმოცაძემ შეიყვანა, რომელმაც საიდუმლო ბაზაზე შესვლა სამსახურეობრივი საშვით შეძლო.