ექვსი წლის განმავლობაში უსიცოცხლო უდაბნოში ხეტიალი შეიძლება მოსაწყენად მოგვეჩვენოს, თუმცა Curiosity-სთვის ეს ასე სულაც არ არის.

5 აგვისტოს რობოტს მარსზე ყოფნის ექვსი წელი შეუსრულდა. Curiosity-მ დაბადების დღე ტვიტერზე პოსტით აღნიშნა.

"მარსს პირველად ამ დღეს, ექვსი წლის წინ შევეხე. ჩემს მეექვსე იუბილეს კი ტრადიციული საჩუქრით, რკინის ოქსიდით აღვნიშნავ (ეს სწორედ ისაა, რაც მარსს წითელ ფერს აძლევს)"

ინტერნეტში გავრცელებული ინფორმაციის თანახმად, რობოტი ყოველ წელს თავის თავს დაბადების დღის სიმღერას უმღერის, თუმცა ეს ინფორმაცია სიმართლეს არ შეესაბამება.

Curiosity-მ თავის თავს მხოლოდ ერთხელ, პირველ დაბადების დღეზე უმღერა.

რობოტზე სპეციალური ქიმიური ლაბორატორიაა დამონტაჟებული, რომელიც მარსზე მოპოვებულ ქვიშასა და ქვებს აანალიზებს.

2013 წლის აგვისტოში ნასამ გადაწყვიტა, რომ რობოტის დაბადების დღე განსაკუთრებულად აღენიშნა. მეცნიერებმა ეს მოწყობილობა ისე დააპროგრამეს, რომ ვიბრაციებით მელოდია შექმნეს. 2013 წელს მარსზე მყოფმა რობოტმა თავის თავს დაბადების დღის სიმღერა უმღერა.

ცივი გონებით თუ შევხედავთ, მარსზე სიმღერას მეცნიერებისთვის არანაირი სარგებელი არ მოაქვს და რობოტი ამისთვის ენერგიასა და რესურსებს ხარჯავს.

ამის გამო, წელს რობოტი თავის დაბადების დღეს მოკრძალებულად შეხვდა და მხოლოდ ტვიტერზე დაწერილი პოსტით შემოიფარგლა.