დიდი ხანია ვიცით, რომ ძაღლებს სუნის მეშვეობით კომუნიკაცია შეუძლიათ. ისინი შარდავენ ახალ ტერიტორიებზე, სახლში, ეზოში, საკუთარ სათამაშოებზე და იქ, სადაც მოესურვებათ.

ახლახან კი გავიგეთ, რომ პატარა ძაღლები ფეხს იმაზე დიდი კუთხით წევენ, ვიდრე დიდი ძაღლები. სავარაუდოდ ისინი ცდილობენ, რომ სხვებს თავი დიდებად მოაჩვენონ.

"ჩვენი კვლევები ადასტურებს, რომ მოშარდვით დატოვებული ინფორმაცია შეიძლება ცრუ იყოს," - ამბობენ კვლევის ავტორები.

კორნელის უნივერსიტეტის მკვლევარებს ჯერ უნდა გაერკვიათ შესაძლებელი იყო თუ არა აწეული ფეხის კუთხის სიდიდით შარდის ტრაექტორიის გაზომვა. ამის გასარკვევად მათ თავშესაფრის ძაღლები სასეირნოდ წაიყვანეს და მოშარდვის პროცესი გადაიღეს. როგორც აღმოჩნდა, ფეხის აწევის კუთხით საკმაოდ ზუსტად შეიძლება შარდის სიმაღლე და მიმართულება ვივარაუდოთ.

შემდეგ მეცნიერებმა ძაღლის ზომასა და მისი ფეხის აწევის კუთხეს შორის კავშირი შეისწავლეს. აღმოჩნდა, რომ პატარა ზომის ძაღლების ფეხის აწევის კუთხე უფრო მეტი იყო, ვიდრე დიდების.

პატარა ძაღლები ცდილობდნენ, რომ თავიანთი კვალი დიდი ძაღლების მიერ დატოვებული კვალისთვის მიემსგავსებინათ.

კვლევის ავტორების თქმით, პატარა ძაღლებისთვის ასეთი ქცევა შეიძლება მომგებიანი იყოს. ამის საშუალებით ისინი სხვა ძაღლების თვალში იმაზე უფრო დიდები და ძლიერები გამოჩნდებიან, ვიდრე ისინი სინამდვილეში არიან. ეს კი მათ სხვებთან კონფლიქტის თავიდან არიდებაში ეხმარება.

მეცნიერები ასევე აღნიშნავენ, რომ ამ ფაქტის დასადასტურებლად დამატებითი კვლევებია საჭირო. ეს ყველაფერი შესაძლოა უბრალოდ იმითაც იხსნებოდეს, რომ დიდ ძაღლებს ანატომიური თავისებურებების გამო ფეხის უფრო მაღლა აწევა ფიზიკურად არ შეუძლიათ.

ცნობილია, რომ მსგავს ცრუ სიგნალებს სიძლიერის და ზომის გასაზვიადებლად ბევრი სხვა ცხოველიც მიმართავს.