ამჟამინდელი მდგომარეობით NASA ამერიკელი ასტრონავტების ორბიტაზე გასაყვანად რუსეთზეა დამოკიდებული, თუმცა SpaceX-ის წყალობით ეს მდგომარეობა მალე შეიცვლება.

2014 წელს ამერიკის მთავრობამ SpaceX-ს და Boeing-ს კომერციული კოსმოსური პროგრამის გასავითარებლად რამდენიმე მილიარდი დოლარი გადაუხადა. მას შემდეგ პროექტი მრავალჯერ გადაიდო, თუმცა ახლახან გაშვების საბოლოო თარიღები ცნობილი გახდა.

ნასას განცხადებაში ნათქვამია, რომ SpaceX-ის ხომალდი Crew Dragon პირველი უპილოტო ფრენისთვის მზად 2018 წლის ნოემბერში იქნება, ხოლო პირველ პილოტირებულ ფრენას ის 2019 წლის აპრილში განახორციელებს. Boeing-ის ადამიანების გადასაყვანი კაფსულა CST-100 Starliner უპილოტო ფრენას 2019 წლის დასაწყისში შეძლებს, ხოლო პილოტირებულ სატესტო მისიას კომპანია 2019 წლის მეორე ნახევარში გეგმავს.

ამ ყველაფრის შემდეგ ორივე ხომალდი NASA-ს სერტიფიცირების პროგრამას გაივლის, რომლის წარმატებით დასრულების შემთხვევაშიც ორივე კომპანიას ამერიკელი ასტრონავტების ორბიტაზე გაყვანა რეგულარულ რეჟიმში შეეძლება. ხომალდების სერტიფიცირების პროცესი სავარაუდოდ 2020 წლის თებერვალში დასრულდება.

ახლა ამერიკელი ასტრონავტები საერთაშორისო კოსმოსურ სადგურზე მისასვლელად რუსულ ხომალდ Soyuz-ზე არიან დამოკიდებულნი, თუმცა არსებულ კონტრაქტს ვადა 2019 წლის ნოემბერში გასდის, რის შემდეგაც NASA-ს კოსმოსურ სადგურზე წვდომა აღარ ექნება.