ახალი ამბავი არ არის, რომ ადამიანების უმრავლესობას სახლის საქმეების კეთება საშინლად ეზარება. ალბათ, იმაზეც ვთანხმდებით, რომ დროა, ჩვენი მოვალეობების ეს ნაწილი რობოტებმა გადაიბარონ.

თუ აქამდე არ გაგიგიათ, გეტყვით, რომ უკვე არსებობს რობოტი, რომელიც სარეცხვს თქვენ ნაცვლად გაუმკლავდება. ამ იაპონურ რობოტს Laundroid ჰქვია.

ჯერჯერობით ლონდროიდი ძალიან ნელია. ის ერთი მაისურის დაკეცვას ოთხ წუთს ანდომებს. მისი ამერიკული ანალოგი კი კიდევ უფრო ზანტია და ამ საქმისთვის 15 წუთს საჭიროებს.

ამ რობოტს პირსახოცის დასაკეცად 15 წუთი სჭირდება

ფოტო: Berkeley AI Research Lab/Berkeley Robot Learning Lab

ერთი შეხედვით, უცნაურია, რომ რობოტები, რომლებსაც უკვე ამდენი რამ შეუძლიათ, გარეცხილი ტანსაცმლის დაკეცვას ვერ ახერხებენ. საქმე ისაა, რომ სახლის საქმეებში უამრავი პატარა დეტალია გასათვალისწინებელი. სახლის გარემო მუდმივად ცვალებადია, ასეთ გარემოში მომუშავე რობოტს მრავალი სხვადასხვა მახასიათებლის მყისიერი გაანალიზება უნდა შეეძლოს.

რობოტს, რა თქმა უნდა არანაირი წინასწარი ცოდნა არ აქვს. როდესაც ჩვენ მას ვეუბნებით, რომ ტანსაცმელი დაკეცოს, მან ჯერ უნდა აღიქვას ნივთის მასშტაბები, მერე კი მიხვდეს, როგორ გამოიყენოს საკუთარი სენსორები და კამერები მის დასაკეცად. გზადაგზა ის უამრავ სირთულეს აწყდება, ასისტენტი კი, რომელსაც მუდმივად დახმარება სჭირდება, უვარგისი ასისტენტია.

რობოტისთვის ერთი საოჯახო საქმის სწავლებაც კი საკმაოდ რთული საქმეა და თუ მას მხოლოდ სარეცხის დაკეცვა ეცოდინება, სახლის სრულად დასალაგებლად შეიძლება ათეულობით რობოტი დაგვჭირდეს, რაც დაგვეთანხმებით, მოუხერხებელია.

ამჟამად ინჟინრების მთავარი გამოწვევა ისეთი რობოტის შექმნაა, რომელსაც დავალების შესრულების პროცესში დამატებითი ინსტრუქციები არ დასჭირდება.