ინგლისელი მომღერალი და ცნობილი ბოიბენდის, One Direction-ის, ყოფილი წევრი ლიამ პეინი არგენტინის დედაქალაქ ბუენოს-აირესში გარდაიცვალა. ადგილობრივი მედიის ცნობით, 31 წლის პოპვარსკვლავი სასტუმროს მესამე სართულის ფანჯრიდან გადავარდა. ადგილზე გამოძახებული სასწრაფო დახმარების ექიმებს სასტუმროს შიდა ეზოში პეინი გარდაცვლილი დახვდათ.

არგენტინული გამოცემები ასევე წერენ, რომ ინციდენტამდე ცოტა ხნით ადრე ამავე სასტუმროში პოლიცია გამოიძახეს "ალკოჰოლური ან ნარკოტიკული საშუალების შესაძლო თრობის ქვეშ მყოფი კაცის აგრესიული ქცევის გამო". თუმცა, პოლიციას არ დაუდასტურებია, რომ ეს პირი პეინი იყო.

ლიამ პეინმა მუსიკალური კარიერა 2008 წელს დაიწყო, როცა ბრიტანულ X ფაქტორში გამოჩნდა, მაგრამ მისი ეს მცდელობა წარუმატებელი გამოდგა. პეინი ორი წლის შემდეგ ამავე პროექტში დაბრუნდა და ოთხ სხვა მუსიკოსთან — ჰარი სტაილსთან, ზეინ მალიკთან, ნაილ ჰორანთან და ლუი ტომლინსონთან — ერთად ჩამოაყალიბა One Direction, რომელიც ყველა დროის ერთ-ერთ ყველაზე პოპულარულ ბოიბენდად იქცა. ახალგაზრდების საკულტო პოპჯგუფის ანგარიშზე 70 მილიონამდე გაყიდული ჩანაწერია.

ფოტო: Shutterstock

მას შემდეგ, რაც 2016 წელს One Direction-მა შემოქმედებითი პაუზა განუსაზღვრელი დროით აიღო, პეინმა, სხვა წევრების მსგავსად, სოლო კარიერა დაიწყო და 2017 წელს სადებიუტო სოლო სინგლი, 2019 წელს კი პირველი სოლო ალბომი გამოუშვა. პეინის სიმღერები ჩარტებში მოწინავე პოზიციებზე აღმოჩნდა, მუსიკოსმა კი ხანმოკლე სოლო კარიერის განმავლობაში 18 მილიონზე მეტი სინგლი გაყიდა.