რუსეთის საგარეო საქმეთა მინისტრს, სერგეი ლავროვს, "არ აქვს საფუძველი, არ სჯეროდეს" საქართველოს მმართველი პარტიის საპატიო თავმჯდომარის, ბიძინა ივანიშვილის განცხადებისა, რომ დასავლეთი რუსეთის წინააღმდეგ "მეორე ფრონტის" გახსნას სთავაზობდა.

"არ მაქვს საფუძველი ქართულ ოცნებას არ დავუჯერო", — ამის შესახებ რუსეთის საგარეო საქმეთა მინისტრმა, სერგეი ლავროვმა ყაზანში გამართულ BRICS-ის სამიტზე ჟურნალისტებთან განაცხადა.

მისი თქმით, საქართველოს მმართველი პარტიის წევრებს დიალოგები მოჰყვათ იმის შესახებ, რომ საქართველოს დასავლეთის ქვეყნები რუსეთის წინააღმდეგ აქეზებდნენ.

"არ მაქვს საფუძველი მათ [ქართულ ოცნებას] არ დავუჯერო. დიალოგები მოჰყავთ დასავლეთის ქვეყნებთან, რომლებიც პირდაპირ აქეზებდნენ რუსეთის წინააღმდეგ სამხედრო ქმედებებისთვის. საფუძველი არ მაქვს მათ არ ვენდო", — განაცხადა სერგეი ლავროვმა.

შეგახსენებთ, რომ რუსეთის ქალაქ ყაზანში BRICS-ის სამიტი დღეს გაიხსნა. სამიტზე დასასწრებად რუსეთში ჩინეთის, ინდოეთის, ეგვიპტის, სამხრეთ აფრიკის რესპუბლიკის ლიდერები ჩავიდნენ. სამიტს ასევე დაესწრებიან თურქეთის პრეზიდენტი, რეჯეფ თაიფ ერდოღანი, ირანის პრეზიდენტი, მასუდ ფეზეშქიანი, აზერბაიჯანის პრეზიდენტი, ილჰამ ალიევი და სომხეთის პრემიერ-მინისტრი, ნიკოლ ფაშინიანი.

BRICS 2006 წელს რუსეთის, ჩინეთის, ინდოეთის და ბრაზილიის მიერ შეიქმნა. სამხრეთ აფრიკის რესპუბლიკა ორგანიზაციას 2011 წელს შეუერთდა. 2024 წლის დასაწყისიდან BRICS-ს შეუერთდნენ ეგვიპტე, ეთიოპია, ირანი, არაბთა გაერთიანებული საამიროები და საუდის არაბეთი.