"ნუ გეშინიათ, თავისუფლების არასოდეს უნდა გეშინოდეთ. ხმები იქნება დაცული", — ამის შესახებ საქართველოს პრეზიდენტმა, სალომე ზურაბიშვილმა ფორმულას ეთერში განაცხადა. მისი თქმით, ელექტრონული არჩევნები ხმის ფარულად მიცემას უზრუნველყოფს და მის სანდოობაში ეჭვი არ უნდა შეგვეპაროს.

"ნუ გეშინიათ, თავისუფლების არასოდეს უნდა გეშინოდეთ. ხმები იქნება დაცული, იქნება ფარული კენჭისყრა. ის ხმები, ჭორები, რომ ეს აპარატი რაღაცას მოიცავს და შეიძლება იცოდნენ ვის აძლევ ხმას, ჭორებია იმისთვის, რომ ხალხში გაჩნდეს ეჭვი და შიში. ეს არის ისეთ ელექტრონული პროცედურები, რომლებიც სხვადასხვა ქვეყნებში არსებობს და საერთაშორისო კომპანია არ წავა იმაზე, რომ თავისი რეპუტაცია საქართველოს გულისთვის დააყენოს კითხვის ქვეშ", — განაცხადა პრეზიდენტმა.

რაც შეეხება ქართული ოცნების საპატიო თავმჯდომარის მუქარას ოპოზიციური პარტიებისა და მათი მხარდამჭერების მისამართით, პრეზიდენტმა განაცხადა, რომ „ამას არ უნდა ვუსმინოთ“.

"გუშინდელი მცდელობა ივანიშვილის, რომ დააშინოს ხალხი — თქვა, რომ იმ პარტიას და ამ პარტიას და მათ მხარდამჭერებს, მერე დავიჭერთ და არ ვიცი რას ვუზამთ — ნურც უსმენთ ასეთ რამეს. ეს არის ჩვენს ხელში და ჩვენს ხელში მშვიდად წყნარად, გადაწყდება ეს არჩევნები და მთავარი არის მობილიზაცია. ჩვენს ქვეყანაში ყოველთვის იცვლება ხელისუფლება ამ ფორმით, თუკი ამომრჩევლები, მთელი მოსახლეობა, მზადაა იმისთვის, გამოვიდეს და თავისი ხმა და ნება გამოხატოს", — განაცხადა პრეზიდენტმა. (სტილი დაცულია).