ახალი ზელანდიის პარლამენტმა დაამტკიცა კანონი, რომლის მიხედვითაც დამქირავებელი ვალდებულია, რომ ოჯახში ძალადობის მსხვერპლებს წელიწადში ათდღიანი ანაზღაურებადი შვებულება მისცეს.

შვებულების აღებას შეძლებენ როგორც თვითონ მსხვერპლები, ასევე ისინი, ვინც ძალადობის მსხვერპლ ბავშვებზე ზრუნავს. კანონი კრძალავს მსხვერპლის დისკრიმინაციას. ასევე, ითვალისწინებს, რომ მან დამსაქმებლისგან მოქნილი სამუშაო პირობები მოითხოვოს.

BBC წერს, რომ ახალი ზელანდია პირველი ქვეყანაა, რომელიც ოჯახში ძალადობის მსხვერპლებისთვის ანაზღაურებად შვებულებას აწესებს. ანალოგიური კანონები განიხილება კანადასა და ავსტრალიაში.

25 ივლისს ინიციატივას ზელანდიის პარლამენტში 63 დეპუტატმა დაუჭირა მხარი. კანონპროექტს მხარი დაუჭირა მწვანეების პარტიისა და მმართველი ორი პარტიის დეპუტატებმა. წინააღმდეგი იყო 57 დეპუტატი.

დეპუტატმა ჯენ ლოჯიმ, რომელმაც შეიტანა კანონპროექტი 2016 წელს, განმარტა, რომ არსებული კანონი ძალადობის მსხვერპლებს არ აძლევს საშუალებას აუცილებელი იურიდიული საქმეები მოაგვარონ, ასევე, იპოვონ საცხოვრებელი და გაიარონ თერაპია. მან, ასევე, დაამატა, რომ ოჯახში ძალადობამ "სიცოცხლესა და სამსახურს შორის" საზღვარი არ იცის. ბევრი მოძალადე თავის მსხვერპლს სამსახურში ურეკავს, ემუქრება მას და სამსახურიდან მის დათხოვნას ცდილობს. კიდევ ერთმა დეპუტატმა თქვა, რომ ახალი კანონი მსხვერპლებს დროსა და სივრცეს მისცემს, რათა დაისვენონ და "გადაეწყონ".

ოპოზიცია ამბობდა, რომ კანონი ოჯახში ძალადობას ვერ შეაჩერებს და დამსაქმებლები თანამშრომლის აყვანისას დაიწყებენ "ფილტრაციას" იმის მიხედვით, გახდება თუ არა ის ძალადობის მსხვერპლი. ასევე, ნაციონალური პარტიის წევრები ითხოვდნენ, რომ ზარალის თავიდან ასაცილებლად შვებულების ფული არა მცირე და საშუალო ბიზნესს, არამედ სახელმწიფოს აენაზღაურებინა. კანონის მომხრეები კი ამტკიცებდნენ, რომ ოჯახში ძალადობის გამო დამსაქმებლები უკვე განიცდიან ზარალს, მათ შორის, მსხვერპლების სამსახურიდან დათხოვნით.

განვითარებულ ქვეყნებს შორის ახალ ზელანდიაში ოჯახში ძალადობის რიცხვი ერთ-ერთი ყველაზე მაღალია. პოლიციას ოჯახში ძალადობის ინციდენტებზე ყოველ ოთხ წუთში უწევს რეაგირება.