ქვემო სვანეთის მკვიდრებმა ჭუბერისა და ხაიშის მოსახლეობას, რომლებიც ხე-ტყის უკანონო ჭრაზე საგამოძიებო მოქმედებებსა და სოფლებში სპეცრაზმის შეყვანას აპროტესტებენ, სოლიდარობა გამოუცხადეს. მათი განცხადებით, ლენტეხში ანალოგიური პრობლემა აქვთ.

სვანეთში საპროტესტო აქცია გრძელდება. მოსახლეობას გადაკეტილი აქვს ჭუბერისა და ხაიშის დამაკავშირებელი გზა. მათი განცხადებით, სვანეთში ხე-ტყის ჭრის გარდა სხვა შემოსავლის წყარო არ არსებობს.

დღეს, 26 ივლისს ჭუბერსა და ხაიშში, სპეცდანიშნულების რაზმების გამოჩენას დაპირისპირება მოყვა. ადგილობრივებმა სპეცრაზმს სახლების ჩხრეკის უფლება არ მისცეს და ხელკეტები და ქვები დაუშინეს. ადგილობრივების თქმით, სამართალდამცავმა ერთ-ერთ მოსახლეს შუბლზე იარაღი მიაბჯინა, რასაც დაპირისპირება მოყვა.

ფინანსთა სამინისტროს საგამოძიებო სამსახურის ინფორმაციით, ჭუბერსა და ხაიშში მოსახლეობა საგამოძიებო მოქმედებებს ხელს უშლიდა და სპეცრაზმის მობილიზებაც ამიტომ გახდა საჭირო.

უწყებაში ამბობენ, რომ სვანეთში ხე-ტყის გადამამუშავებელი და ხის მასალის რეალიზატორი საწარმოების საქმიანობის კანონიერების შემოწმება, ასევე რეგისტრაციის გარეშე მოქმედი ხის სახერხი საამქროების გამოვლენა მიმდინარეობს.