ერთობლივ მუშაობაზე ტარიფებისა და სხვა სავაჭრო ბარიერების აღმოფხვრის მიმართულებით აშშ და ევროკავშირი შეთანხმდნენ. შეთანხმებას მხარეებმა 25 ივლისს, ვაშინგტონში, დონალდ ტრამპისა და ჟან კლოდ იუნკერის შეხვედრაზე მიაღწიეს.

გარიგების მიხედვით, აშშ და ევროკავშირი ერთობლივად იმუშავებენ სუბსიდიების, ბარიერებისა და ტარიფების გაუქმების ან შემცირების მიმართულებით, შეთანხმება არ ეხება ავტოწარმოების სეგმენტს.

ასევე, შედგა შეთანხმება სერვისების სფეროსა და აგრარული სფეროს მიმართულებით. შედეგად ამერიკული სოფლის მეურნეობის პროდუქციისთვის ევროპული ბაზარი უფრო ხელმისაწვდომი იქნება.

შეხვედრის შემდეგ გამართულ საერთო პრესკონფერენციაზე ორივე მხარემ კმაყოფილება გამოხატა. დონალდ ტრამპის თქმით, აშშ-სა და ევროპის ურთიერთობაში ახალი ეტაპი დაიწყო.

"ჩვენ მივაღწიეთ შეთანხმებას გაზისა და სოფლის მეურნეობის პროდუქციის ექსპორტზე, შედეგად ევროპა ამერიკული საქონლის დიდი შემსყიდველი იქნება", განაცხადა ტრამპმა.

თავის მხრივ, კმაყოფილება გამოთქვა იუნკერმაც: "მე ვაშინგტონში ჩამოვედი კონკრეტული მიზნით, დაგვედო შეთანხმება, მიზანი მიღწეულია. ჩვენ შეგვიძლია ერთობლივად ვიმუშაოთ ბევრი მიმართულებით".

ტრამპისა და იუნკერის შეხვედრა დაძაბულ საერთაშორისო ფონზე მიმდინარეობდა. წინა თვეში, მხარეებმა ორივე ქვეყნის ეკონომიკისთვის მძიმე გადაწყვეტილებები მიიღეს. ივნისში ამერიკამ ევროკავშირიდან იმპორტირებულ ფოლადისა და ალუმინის პროდუქციაზე 25-პროცენტიანი სატარიფო მარჟა დააწესა. იგივე ნაბიჯი გადადგა ევროკავშირმაც და ამერიკიდან ექსპორტირებული პროდუქციის ფართო სპექტრზე იგივე ზომის სატარიფო გეგმა დააწესა.

საპასუხო ნაბიჯის შემდეგ, დონალდ ტრამპი დაემუქრა ევროკავშირს დამატებითი 20-პროცენტიანი ტარიფით, ევროპაში წარმოებულ ავტომობილებზე.

შეთანხმება არ არის საბოლოო და ამ მიმართულებით ჯერ კიდევ არსებობს გარკვეული საფრთხე. ტრამპისა და იუნკერის შეხვედრას წინ უსწრებდა იაპონიასა და ევროკავშირს შორის თავისუფალი ვაჭრობის ხელშეკრულების გაფორმება.