პრემიერ-მინისტრი, მამუკა ბახტაძე ქართული ოცნების თავმჯდომარის, ბიძინა ივანიშვილის სატელევიზიო ინტერვიუს გამოეხმაურა. მისი თქმით, ივანიშვილმა ინტერვიუში სწორი აქცენტები დასვა არსებულ პრობლემებსა და, ზოგადად, მდგომარეობაზე.

"ვფიქრობ, რომ ბიძინა ივანიშვილმა გააკეთა ძალიან სწორი აქცენტები იმ გამოწვევებზე, რაც დღეს გვაქვს ჩვენს ეკონომიკაში, ამავე დროს, იმ ძალიან მნიშვნელოვან პროგრესზე, რომელსაც მიაღწია საქართველომ ქართული ოცნების მმართველ პარტიად ყოფნის პერიოდში", - განაცხადა პრემიერმა დღეს, 26 ივლისს გამართულ ბრიფინგზე.

ბახტაძის განცხადებითვე, ივანიშვილის ინტერვიუ მთავრობის საქმიანობისადმი საკმაოდ კრიტიკული იყო. პრემიერი ამბობს იმასაც, რომ ოპოზიციის მხრიდან ივანიშვილისადმი პერსონალური ერიშების მიტანა კვლავაც გრძელდება.

"ჩვენ ვერ მოვისმინეთ, კიდევ ერთხელ, შინაარსობრივი არგუმენტაცია, იმ საკითხებთან დაკავშირებით, თუ რაში არ შეიძლება ადამიანი დაეთანხმო იმ მნიშვნელოვან აქცენტებს, რომლების გააკეთა პარტიის თავმჯდომარემ თავის გამოსვლაში", - განაცხადა ბახტაძემ.

ქართული ოცნების დამფუძნებელმა, ყოფილმა პრემიერ-მინისტრმა და ახლა უკვე ოფიციალურად გაფორმებულმა პოლიტსაბჭოს თავმჯდომარემ, ბიძინა ივანიშვილმა პოლიტიკაში დაბრუნების შემდეგ პირველი სატელევიზიო ინტერვიუ საზოგადოებრივ მაუწყებელს მისცა. ივანიშვილის ინტერვიუს დიდი ნაწილი ქვეყანაში არსებულ სიღარიბესა და დემოკრატიას შორის არაპროპორციულობასა და გიორგი კვირიკაშვილთან კონფლიქტს უკავშირდებოდა.

გაიგე მეტი: ივანიშვილის ინტერვიუს მთავარი აქცენტები - ერთად და მოკლედ