თბილისის სახელმწიფო უნივერსიტეტის სტუდენტური თვითმმართველობის წარმომადგენლებმა შიმშილობა მას შემდეგ შეწყვიტეს, რაც მათი მოთხოვნა დაკმაყოფილდა და გაცხადდა, რომ უნივერსიტეტის რექტორი, ვლადიმერ პაპავა თანამდებობას 1 მაისს დატოვებს.

როგორც სტუდენტური თვითმმართველობის პრეზიდენტმა, შალვა საბაურმა On.ge-სთან საუბარში განაცხადა, ამ ეტაპზე რაიმე კონკრეტული გადაწყვეტილება იმის შესახებ, დატოვებენ თუ არა თვითმმართველობის ხელმძღვანელი პირები თანამდებობებს, არ მიუღიათ, რადგან თსუ-ში ე.წ. ოდეერების არსებობის საკითხი ისევ დგას. მისი თქმით, სტუდენტები იმსჯელებენ და მათი შემდგომი ნაბიჯების შესახებ გადაწყვეტილება უახლოეს დღეებში გახდება ცნობილი.

სტუდენტური თვითმმართველობის 7-მა წევრმა შიმშილობა გუშინ, 29 მარტს, თსუ-ს რექტორის გადადგომის მოთხოვნით დაიწყო. მათ დღეს კიდევ 10 სტუდენტი შეუერთდა.

დღესვე On.ge-ს თსუ-ს საზოგადოებასთან ურთიერთობის დეპარტამენტმა მიაწოდა ინფორმაცია, რომ უნივერსიტეტის რექტორი ვლადიმერ პაპავა პირველ მაისს გადადგება, მანამდე კი თსუ-ში რექტორის მოვალეობის შემსრულებლის არჩევნები გაიმართება.

მანამდე, თსუ-ში აუდიტორია 115-სა და თვითმმართველობას შორის რიგ საკითხებზე შეუთანხმებლობის გამო დაწყებული დაპირისპირების ფონზე, თვითმმართველობის ხელმძღვანელი პირები აცხადებდნენ, რომ თანამდებობებს იმ შემთხვევაში დატოვებდნენ, თუ თსუ-ს რექტორი ვლადიმერ პაპავა გადადგებოდა.