საპარლამენტო უმრავლესობის წევრის, რომან კაკულიას შეფასებით, ის ვერ წარმოიდგენდა, რომ ეკონომიკურ ხედვაში ბიძინა ივანიშვილსა და გიორგი კვირიკაშვილს შორის "ამხელა აცდენა" იყო.

"მე ვერასდროს დავუშვებდი, რომ ასეთი ტიპის ამ ხარისხის აცდენა ხევდაში ეკონომიკურ განვითარებასთან დაკავშირებით, შეიძლებოდა არსებულიყო ქვეყნის პრემიერ-მინისტრსა და ქართული ოცნების დამფუძნებელს შორის, რომელსაც ასეთი მნიშვნელოვანი როლი აქვს ქვეყანაში არსებული რეალობის შექმნაში, როგორიც ეს არის.... ვფიქრობ, გაცილებით ადრე უნდა მცოდნოდა უთანხმოების ამ ხარისხის შესახებ", - განაცხადა რომან კაკულიამ.

24 ივლისს საზოგადოებრივი მაუწყებლობისთვის მიცემულ ინტერვიუში ბიძინა ივანიშვილმა განაცხადა, რომ გიორგი კვირიკაშვილის თანამდებობიდან წასვლის მიზეზი იყო ის, რომ ყოფილ პრემიერ-მინისტრს აღარ შეეძლო მართვა. ის იძულებული გახდა წასულიყო და ამ გადაწყვეტილებაში თავად არ ჩარეულა.

"იყო შემთხვევები, როდესაც ირღვეოდა ბალანსი სახელმწიფოს ინტერესებსა და ბიზნესის ინტერესებს შორის და არღვევდა ამას კვირიკაშვილი თავისი ქმედებებით", - განაცხადა ივანიშვილმა.

ივანიშვილმა, ასევე, დაამატა, რომ კვირიკაშვილს არც მთავრობაში და არც პარლამენტში ნდობა აღარ ჰქონდა. მისივე თქმით, ჭარბვალიანობის პრობლემაზე გიორგი კვირიკაშვილმა და დიმიტრი ქუმსიშვილმა სავალუტო ფონდის კვლევა დამალეს.

ივანიშვილის თქმით, ეკონომიკის ზრდაში მამუკა ბახტაძემ უფრო დიდი როლი ითამაშა, ვიდრე მაშინდელმა პრემიერმა, გიორგი კვირიკაშვილმა.

"7,5%-იანი ეკონომიკური ზრდის ერთ-ერთი ფაქტორი ეფექტური საგადასახადო პოლიტიკა იყო, რაშიც მამუკა ბახტაძემ უფრო მეტი როლი ითამაშა, ვიდრე ორ წელიწადნახევარში კვირიკაშვილმა და ქუმსიშვილმა ერთად, ვინც ეკონომიკას მართავდა", - განაცხადა ივანიშვილმა.

ამავე თემაზე: