პანკისის მცხოვრებლები ხეობაში ჰესების მშენებლობასა და თემირლან მაჩალიკაშვილის საქმის გამოძიებასთან დაკავშირებულ საკითხებს დღეს, 20 ივლისს აქციაზე აპროტესტებდნენ. პანკისის მოსახლეობამ მიმართვაც გაავრცელა, რომელსაც ხელს, აქციის მონაწილის თქმით, 3000-ზე მეტი ადამიანი აწერს.

მიმართვის მიხედვით, 2017 წლის 26 დეკემბერს ხეობაში სპეცოპერაციის შედეგად მოკლული თემირლან მაჩალიკაშილის საქმეზე გამოძიება არაეფექტურია და სახელმწიფოს არ უნდა ჩაეტარებინა ძალის დემონსტრირებაზე ორიენტირებული სპეცოპერაცია. პანკისის მცხოვრებლები მიიჩნევენ, რომ დამნაშავეთა დასჯის ნაცვლად სამართალდამცავები მაჩალიკაშვილების წინააღმდეგ საინფორმაციო ომს ახორციელებენ. მათი აზრით, ამ დრომდე ხელისუფლების წარმომადგენლებს ადგილობრივებთან პასუხისმგებლიანი ურთიერთობა აქ აქვთ.

"თემირლან მაჩალიკაშვილის სიცოცხლის ხელყოფის საქმე ჩვენთვის ხეობის მიმართ სახელმწიფოს რეპრესიული პოლიტიკის გაგრძელებაა და ადგილობრივ მოსახლეობაში, განსაკუთრებით ახალგაზრდებში დაუცველობის და უნდობლობის ღრმა შეგრძნებას იწვევს", - წერია მიმართვაში.

მიმართვის მეორე მოთხოვნა ხეობაში ჰესების მშენებლობის დაუშვებლობა ეკოლოგიური პროცესების გართულების გამო. აქციის მონაწილეების თქმით, სახელმწიფომ მშენებლობაზე ნებართვა იქამდე გასცა, სანამ გეოლოგიური დასკვნა დაიდებოდა.

"ამ პირობებში ადგილობრივი მოსახლეობა დაუშვებლად მიიჩნევს ჩვენს ხეობაში ჰესების მშენებლობას და ყველა სამართლებრივ და მშვიდობიანი პროტესტის საშუალებას გამოიყენებს ამ პროცესის შესაჩერებლად", - ვკითხულობთ მიმართვაში.

პანკისის ხეობის მცხოვრებლები მოთხოვნებით მიმართავენ შემდეგ პირებსა და ორგანოებს: საქართველოს პრემიერ-მინისტრს, მთავრობის ეკონომიკურ გუნდს, შსს-ს, სუს-ს, მთავარ პროკურატურას და პარლამენტს.