ქართული ოცნების დეპუტატმა, დავით ჭიჭინაძემ საქართველოს პარლამენტის თავმჯდომარე მისი განცხადების გამო გაკრიტიკა, რომლის მიხედვითაც შრომითი უსაფრთხოების წესების გამკაცრება გიორგი კვირიკაშვილის პოზიციის გამო ვერ მოხერხდა. ჭიჭინაძის თქმით, კვირიკაშვილი და კობახიძე ადამიანების სიცოცხლის ხარჯზე კომპრომისზე წავიდნენ, რის გამოც პარლამენტის თავმჯდომარემ პასუხისმგებლობა უნდა აიღოს და გადადგეს.

ჭიჭინაძემ გაიხსენა შეხვედრა, რომელიც ტყიბულში მომხდარი ტრაგედიის შემდეგ გაიმართა. მისი თქმით, საპარლამენტო უმრავლესობის დიდი ნაწილი პარლამენტის თავმჯდომარისგან მოითხოვდა, რომ შრომითი უსაფრთხოების შესახებ კანონმდებლობა გაემკაცრებინა, თუმცა მათ უარი მიიღეს.

"როდესაც ვაფასებ ამ ახალგაზრდა გუნდს და კომკავშირლებს ვეძახი, ტყუილად - არა. ეს ადამიანები კომუნისტური პარტიის ყრილობების სხვადასხვა მოვლენას მახსენებენ, როდესაც ვიღაცას გაკიცხავდნენ და გადაყენებულ ადამიანს ფეხებით შედგებოდნენ. კომპრომისზე შეიძლება, წახვიდე ორი ადამიანი, როდესაც ერთმანეთში რაღაცაზე რიგდები, მაგრამ ორი ადამიანი გარიგდეს და ათობით ადამიანი დაიხოცოს, მერე გამოხვიდე და ეს აღიარო, მე ასეთ კომპრომისზე არ წავსულვარ", -განაცხადა დავით ჭიჭინაძემ.

მისი თქმით, გაუგებარია რას ნიშნავს კომპრომისი, სხვების სიცოცხლის ხარჯზე.

"რა თქმა უნდა, უნდა გადადგეს", - განაცხადა დავით ჭიჭინაძემ.

ტყიბულში, მინდელის სახელობის შახტში კიდევ 4 მუშა დაიღუპა, ხოლო 6 დაშავდა. დამოუკიდებელი პროფკავშირების ინფორმაციით, 2018 წელს ტყიბულის შახტში სულ 12 ადამიანი გარდაიცვალა. შსს-ს გადაწყვეტილებით, გამოძიების დასრულებამდე ტყიბულში არსებული 25-ვე შახტი დღესვე დაილუქება. პრემიერ-მინისტრმა 16 ივლისი გლოვის დღედ გამოაცხადა.