საქართველოს პარლამენტის დამოუკიდებელი კანდიდატი, სალომე ზურაბიშვილი ამბობს, რომ პრეზიდენტობის კანდიდატად დასახელებაზე ქართულ ოცნებასთან მოლაპარაკება ამჟამად არ მიმდინარეობს.

"ის, რისი თქმაც მე მინდა, გეტყვით იმ დღეს, როცა მე გადავწყვეტ. ყველას დაგიბარებთ და ყველას გეტყვით. მაქვს ეს გამოცდილება ბრიფინგების და ბრიფინგს ჩავატარებ", - განაცხადა ზურაბიშვილმა ჟურნალისტებთან საუბრისას.

აღნიშნულ ინფორმაციას არც საპარლამენტო უმრავლესობაში ადასტურებენ, თუმცა ზოგიერთი დეპუტატი ზურაბიშვილის კანდიდატურას დადებითად აფასებს. საპარლამენტო უმრავლესობის წევრების თქმით, პარტიაში ჯერ-ჯერობით კანდიდატის ვინაობის განხილვა არ დაწყებულა, თუმცა არაფერს გამორიცხავენ.

"მე ვფიქრობ, რომ სალომე ზურაბიშვილი არის ყველანაირად მომზადებული ადამიანი, აქვს ძალიან დიდი გამოცდილება დაგროვილი და არამარტო პრეზიდენტს, მე ყველა პოზიციაზე მხარს დავუჭერ", - აცხადებს უმრავლესობის წევრი, შოთა ხაბარელი.

ევროპული საქართველოს წევრის, გიგა ბოკერიას თქმით, ქართული ოცნების კანდიდატის ვინაობას მნიშვნელობა არ აქვს.

"სალომე ზურაბიშვილს ისევე შევაფასებ, როგორც ნებისმიერ სხვა კანდიდატს ივანიშვილის გუნდიდან. ქალბატონი ზურაბიშვილი არის მმართველი გუნდის წევრი", - ამბობს ბოკერია.

რაც შეეხება პატრიოტთა ალიანსის პოზიციას, პარტიის წევრის, ემზარ კვიციანის თქმით, ზურაბიშვილს როგორც კარგი, ისე ცუდი ნაბიჯები აქვს წარსულში გადადგმული. კარგ ნაბიჯად დეპუტატი რუსული ბაზების საქართველოდან გასვლის დროს კანდიდატის ინტენსიურად მუშაობას ასახელებს.

" აქვს ცუდი განცხადებაც გაკეთებული. მაგალითად, მოქალაქეობასთან დაკავშირებით, როცა თქვა, რომ 21-ე საუკუნეში რას ნიშნავს ეთნიკურად ქართველი, სირცხვილია უბრალოდო", - აცხადებს პატრიოტთა ალიანსის წევრი.