გამოცდების ეროვნული ცენტრის განმარტებით, naec.ge-ს ვებგვერდის მობილურ ვერსიაზე ვიზიტორები არაკორექტირებულ ფაილს ხედავდნენ, რამაც დაბნეულობა გამოიწვია.

"განვმარტავთ, რომ ფაილში მოცემული დამატებითი ინფორმაცია არ არის საგამოცდო ტესტის ვერსიების სწორი პასუხები, რაშიც არა მხოლოდ აპლიკანტები, არამედ ნებისმიერი მსურველი დარწმუნდება ტესტების და სწორი პასუხების გამოქვეყნებისას", - ნათქვამია ცენტრის მიერ გავრცელებულ განცხადებაში.

მათივე თქმით, ვებგვერდზე გამოქვეყნებულია A ტიპის სამაგისტრო ტესტი და A ტიპის ტესტის პასუხები.

გამოცდების ეროვნულმა ცენტრმა ვებგვერდზე შემთხვევით, სავარაუდოდ, სამაგისტრო გამოცდების სამომავლო ტესტირების პასუხები რამდენიმე წუთით გამოაქვეყნა. საუბარია მაგისტრატურის B და C ტესტის ტიპებზე, რომელიც 18-19 და 24-25 ივლისს უნდა ჩატარდეს. 11-12 ივლისს A ტესტის ტიპის გამოცდა ჩატარდა.

ტესტების პასუხების სქრინები სოციალურ ქსელში გავრცელდა. რამდენიმე მათგანი On.ge-მაც მოიპოვა. როგორც ერთ-ერთი სტუდენტი სოციალურ ქსელში წერს, B და C ტესტირების პასუხები გამოცდების ეროვნული ცენტრის ვებგვერდზე რამდენიმე წუთის განმავლობაში იდო, სტუდენტებმა პასუხების დასქრინვა მოასწრეს. ამ ეტაპისთვის ტესტირებების პასუხები ვებგვერდზე არ იძებნება.