უკრაინის გენერალურმა პროკურორმა, ვიქტორ შოკინმა დავით საყვარელიძე თანამდებობიდან გაათავისუფლა.

საყვარელიძე სტრუქტურის რეფორმირებასა და კორუფციის საქმეებს კურირებდა.

უკრაინის გენერალური პროკურატურის საიტზე გამოქვეყნებულ ბრძანებაში ვკითხულობთ, რომ საყვარელიძის გათავისუფლება სტრუქტურის უკრაინის კანონმდებლობასთან შესაბამისობაში მოყვანის მიზეზით მოხდა.

განცხადებაში ასევე ნათქვამია, რომ საყვარელიძემ დაარღვია პროკურორთა ეთიკა და კანონთან შეუსაბამოდ ჩაერია სხვა პროკურორის საქმიანობაში.

საყვარელიძე ე.წ. "ბრილიანტის პროკურორების" საქმეს კურირებდა, რომელიც გენ. პროკურატურის თანამშრომლების ვლადიმერ შაპაკინისა და ალექსანდრ კორნიცის დაკავებას ეხებოდა. ისინი 2015 წლის ივლიში დააკავეს კორუფციის ბრალდებით და ჩხრეკისას დიდი ოდენობის თანხა, იარაღი და 65 ბრილიანტი ამოიღეს.

საყვარელიძე აცხადებდა, რომ მას და მის გუნდს მუშაობის საშუალებას არ აძლევდნენ. მისივე თქმით, ვიქტორ შოკინი მას სამაგიეროს უხდის.

დღესვე უკრაინის რადას გადაწყვეტილებით გენერალური პროკურორი ვიქტორ შოკინი თანამდებობიდან დაითხოვეს. 19 თებერვალს პეტრო პოროშენკოს მიერ რადაში შეტანილი განცხადება, შოკინის გათავისუფლების შესახებ, დეპუტატებმა დღეს, 29 მარტს დაამტკიცეს.

თავად შოკინი რადას ამ გადაწყვეტილების შესახებ ამბობს, რომ მზადაა წავიდეს თანამდებობიდან და გავიდეს პენსიაზე.