მაშველებმა ტაილანდის მღვიმიდან ორი ბიჭის გამოყვანა შეძლეს. ამის შესახებ ინფორმაციას Reuters ავრცელებს. როიტერი წერს, რომ ამის შესახებ ინფორმაცია ადგილობრივი მთავრობის წარმომადგენელმა მიაწოდა.

"ორი ბიჭი უკვე გარეთაა. ისინი სამედიცინო შემოწმებას გადიან", - წერს Reuters.

გამოცემა BBC-მ კი ვიდეო გაავრცელა, სადაც ჩანს, როგორ ტოვებს სასწრაფო სამედიცინო მანქანა გამოქვაბულის შესასვლელს.

ტაილანდში მღვიმეში ჩარჩენილი ბავშვების გამოსაყვანად ოპერაცია უკვე რამდენიმე საათია მიმდინარეობს. მედია, რომელსაც სამაშველო ოპერაციის დაწყების წინ მღვიმის მიმდებარე ტერიტორია დაატოვებინეს, სამედიცინო დახმარების მანქანებს, რომელსაც გადარჩენილები მიყავთ, პირდაპირ ეთერში ელოდება.

12 ბიჭი და მათი ფეხბურთის მწვრთნელი გამოქვაბულში 23 ივნისს აღმოჩნდნენ და აქამდე იქ არიან. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო წყლის დონემ მოულოდნელად მოიმატა და გარეთ გამოსვლა ვეღარ მოახერხეს.

ტაილანდელი ბავშვების მღვინიდამ გამოყვანის შესახებ განახლებადი ინფორმაცია წაიკითხეთ ლინკზე.