ჭუბერში, იქ სადაც ნენსკრაჰესი შენდება, მთის ნაწილი ჩამოიშალა, რამაც ღვარცოფი გამოიწვია. ადიდებულმა მდინარემ წაიღო ხიდები, დატბორილია მიმდებარე ტერიტორია. მსხვერპლის შესახებ ინფორმაცია ჯერჯერობით არ ვრცელდება. ამის შესახებ ინფორმაცია On.ge-ს საგანგებო სიტუაციების მართვის სამსახურში მიაწოდეს.

უწყებაში აცხადებენ, რომ სამაშველო ჯგუფი ჯერ ვერ მივიდა ბოლომდე შემთხვევის ადგილთან, ამიტომ დეტალური ინფორმაცია არ აქვთ.

ნენსკრაჰესის წარმომადგენელმა On.ge-სთან საუბარში განაცხადა, რომ წყლის მოვარდნა მათი მიზეზით არაა გამოწვეული, ვინაიდან ჰესის მშენებლობა ჯერ არ დაუწყიათ და მხოლოდ გზის გაყვანის სამუშაოები მიმდინარეობს.

ფეისბუქზე ვრცელდება ადგილობრივების მიერ გადაღებული ვიდეოკადრები, სადაც ჩანს თუ როგორ მოაქვს ადიდებულ მდინარეს ქვები და ხეები მიმდებარე ტყიდან.