"ლუმოს მაქსიმო" მეგობრებო, თვალები ფართოდ გაახილეთ და დაიწყეთ კითხვა. ფენტეზის დედოფალი გჩუქნით ახალ ბილეთს 93/4 პლატფორმის მატარებელზე, ჯადოსნურ სამყაროში სამოგზაუროდ.

31 ივლისს, ზუსტად დილის 12 საათზე ჩრდილოეთ ამერიკის წიგნის მაღაზიების დახლებს ბესტსელერობისთვის განწირული წიგნი "ჰარი პოტერი და დაწყევლილი ბავშვი" შეავსებს, თანაც ერთი კი არა ორი ტომი. გამომცემლობა Sholastic-ის გავრცელებული ინფორმაციით პირველ ეტაპზე 4,5 მილიონი წიგნი დაიბეჭდება, პლუს გავრცელდება ელ. ვერსიაც.

მაგრამ ეს ყველაფერი როდია. ეკრანთან ახლოს ქართველო პოტერჰედებო, სასიხარულო ინფორმაცია გვაქვს თქვენთვისაც. ბაკურ სულაკაურის გამომცემლობა უახლოეს მომავალში თარგმანს შემოგთავაზებთ.

"სურვილი გვაქვს წლის ბოლომდე გამოვცეთ წიგნი და საახალწლო საჩუქარი გავუკეთოთ პოტერჰედებს, მაგრამ თუ ლიცენზიის მიღების პროცესი გაიწელა, წიგნი სავარაუდოდ, იანვარში გამოვა", - ამბობს ლუკა გრიგოლია, გამომცემლობის პროექტების მენეჯერი.

რატომ მიიღო წიგნმა შეფასება ბესტსელერობისთვის განწირული?

პასუხი მარტივია - მილიონობით პოტერჰედის მოლოდინი გამომცემლებს აიმედებს. თანაც ჰარი პოტერის ისტორიებზე აქამდე 450 მილიონი წიგნია გაყიდული და როულინგი ერთადერთი მწერალია, რომელიც წიგნის წერით მილიარდერი გახდა.

წიგნის ბოლო ნაწილის შემდეგ მწერალმა 7 წლიანი შესვენება აიღო.

7 წელიწადი!... იცი მკითხველო ეს შვიდი წელიწადი, რა შვიდი წელიწადია?

პირველი, რომ მთელი საუკუნეა მისთვის, ვინც საყვარელ გმირებს მოშორებია. მეორე, ეგ შვიდი წელიწადი ბეწვის ხიდია, სიკვდილის მხვრელებსა და პატრონუსებს შუა ბედისაგან გადებული. სწორედ ამიტომ, ჯოან კეინ როულინგმა შეიბრალა პოტერჰედები, თხოვნა გაითვალისწინა და ახალი ისტორია დაწერა.

"ჰარი პოტერი და დაწყევლილი ბავშვი" - ამ ისტორიას დაანონსების დღიდან დიდი რეზონანსი მოყვა რადგან მწერალმა განაცხადა, რომ ეს იყო უბრალო პიესა სპექტაკლისთვის და ისტორია ფართო მასშტაბებს ვერ მიიღებდა. მაგრამ ფანების დაჟინებული მოთხოვნა უფრო ძლიერი არგუმენტია ვიდრე ვოლდემორის ჯადოსნური ჯოხი. როულინგმა გადაიფიქრა - 31 ივლისს წიგნი მზის სინათლეს იხილავს.

ჰოგვორტსის ოქროს სამეულის ისტორია დასასრულს ბნელი ლორდის დამარცხების შემდეგ მიუახლოვდა. საყვარელი პერსონაჟების დიდი დანაკარგების შემდეგ, მწერალმა ბედნიერი დასასრულისთვის გაგვიმეტა და და ბოლოს დაოჯახებული ბედნიერი სამეული ვნახეთ.

გავიგებთ თუ არა წიგნიდან რა მოხდა შემდეგ?

ამჯერად ფოკუსი ჰარის, რონის და ჰერმიონის თავგადასავლების ნაცვლად მათ შთამომავლობაზე ინაცვლებს. დაწყევლილი ბავშვის როლში ჰარის უმცროსი შვილი - ალბუს სევერუს პოტერი გვევლინება, რომელიც მამის პოპულარობის და წარსულის გამო მუდმივ შარში ეხვევა.

დეტალები გაინტერესებთ?

მაშინ დაელოდეთ ისტორიის წიგნის ფურცლებზე გაცოცხლებას და რაც მთავარია საქართველოში გამოცემას. მანამდე კი 30 ივლისს, ერთ-ერთი ყველაზე გახმაურებული და განხილვადი თეატრალური შოუ გველოდება, სადაც ჩვენთვის ნაცნობ სამყაროს დაპატარავების შელოცვით სცენაზე გადმოტანილს, საყვარელ მსახიობებს კი სახეცვლილს ვიხილავთ.

მიუხედავად იმისა, რომ მსახიობების ცვლილება, განსაკუთრებით კი ძველი პერსონაჟებისგან რადიკალური განსხვავებულობა პოტერჰედებს ძალიან აღიზიანებთ, ნაჩქარევ გადაწყვეტილებებს ნუ მივიღებთ. უახლოესი მომავალი გვაჩვენებს რამდენად შეძლებენ სხვა მსახიობები შეუძლებელს, ანუ ჩვენი საყვარელი პერსონაჟების გაცოცხლებას.

მანამ კი სანამ წიგნის წაკითხვის შანსი მოგვეცემა ერთხმად ვთქვათ - "საზეიმო ფიცს ვდებ, რომ დავგეგმავ მხოლოდ ოინებს და არაფერს ოინების გარდა".