შინაგან საქმეთა სამინისტროს განცხადებით, ბოლო 6 თვეში 202 უკანონო ცეცხლსასროლი იარაღი და 1877 საბრძოლო ვაზნა ამოიღო.

უწყების განცხადებით, ერთ-ერთი ბოლო დაკავება ახალქალაქის მუნიციპალიტეტის სოფელ მოდეგამში მოხდა, სადაც ოჯახური ძალადობის ბრალდებით ერთი პირი დააკავეს, სახლის ჩხრეკისას კი იარაღი და საბრძოლო მასალა აღმოაჩინეს. კერძოდ, პისტოლეტი, სხვადასხვა ცეცხლსასროლი იარაღისთვის განკუთვნილი 218 საბრძოლო ვაზნა, ხელყუმბარა, სანადირო თოფის კონდახი და ე.წ. ცევეო, ოპტიკური სამიზნე და ავტომატური ცეცხლსასროლი იარაღის მჭიდი.

გამოძიება ოჯახში ძალადობის, ცეცხლსასროლი იარაღისა და საბრძოლო მასალის უკანონო შეძენა-შენახვის საქმეზე, საქართველოს სისხლის სამართლის კოდექსის 126-პრიმა მუხლით და 236-ე მუხლის მე-2 ნაწილით მიმდინარეობს.

მათივე თქმით, იარაღის და საბრძოლო მასალის უკანონო შეძენა-შენახვის ბრალდებით, საგარეჯოს მუნიციპალიტეტის სოფელ ლამბალოს ერთი მკვიდრი დააკავეს.

უწყებაში ამბობენ, რომ განჩინების საფუძველზე ბრალდებულის საცხოვრებელ სახლში ჩატარებული ჩხრეკისას, "მაკაროვისა" და "გოლდსტარის" სისტემის პისტოლეტები, 3 მჭიდი და 40 საბრძოლო ვაზნა ამოიღეს.

საქმეზე გამოძიება ცეცხლსასროლი იარაღისა და საბრძოლო მასალის უკანონო შეძენა-შენახვის საქმეზე, საქართველოს სსკ-ს 236-ე მუხლის მე-2 ნაწილით მიმდინარეობს.