ხორავას ქუჩაზე ორი ახალგაზრდის მკვლელობის ფაქტის შემსწავლელი საგამოძიებო კომისიის წევრებმა პარტია ევროპული საქართველოდან, ორი რეკომენდაცია შეიმუშავეს, თუმცა მათი განხილვა და საკითხის კენჭისყრაზე დაყენება ორშაბათს, 2 ივლისს გადაიდო.

საქმე ეხება ორ რეკომენდაციას, მათ შორის ხორავას ქუჩაზე მომხდარის დროს კიდევ ერთი არასრულწლოვანის დაჭრის ფაქტზე გამოძიების დაწყებასა და ერთ-ერთი პირის [მ.კ.] მიმართ სისხლის სამართლებრივი დევნის დაწყებას.

რეკომენდაციებს ნაჩქარევს უწოდებს საპარლამენტო უმრავლესობის წევრი მამუკა მდინარაძე. მისი თქმით, დაისვა საკითხი გარკვეულ იურიდიულ პრობლემებზე:

"რამდენად აქვს კომისიას უფლება გასცეს რეკომენდაცია ამ ეტაპზე რეგლამენტის მიხედვითამ ტიპის რეკომენდაცია, რომ, ზოგადად, არა გამოძიება, არამედ, კონკრეტული პირის მიმართ დაიწყოს სისხლის სამართლებრივი დევნა, რამდენად არის ამ პირის ქმედებაში დღევანდელი მოცემულობით და არსებული მტკიცებულებებით იმ დანაშაულის ნიშნები, რაც რეკომენდაციაშია მოცემული".

მდინარაძის თქმით, მისი გუნდი მეორე რეკომენდაციას უფრო მეტად ეთანხმება:

"ეს არ არის მაინცდამაინც ძალიან პრაქტიკული და პრინციპული საკითხი, შესაძლებელია, დავეთანხმოთ კიდევაც".

კომისიის წევრები სახალხო დამცველის აპარატისა და არასამთავრობო ორგანიზაციების წარმომადგენლებს შეხვდნენ. ომბუდსმენის მოადგილის, გიორგი ბურჯანაძის თქმით, რეკომენდაციებთან მიმართებით, მათ შინაარსობლივი ან პროცედურული თვალსაზრისით რაიმე შენიშვნა არ აქვთ.

საგამოძიებო კომისიის სხდომა პარლამენტში 2 ივლისს, 11 საათზე განახლდება. დღის წესრიგის თანახმად, კენჭს უყრიან და განიხილავენ ორ რეკომენდაციას, ასევე გამოიკითხებიან ზვიად კუპრავა და ხორავას ქუჩის საქმის უშუალო გამომძიებელი ირაკლი ფიფია, დეტექტივების სამმართველოს უფროსი იოსებ სიგუა და თბილისის პოლიციის დეპარტამენტის უფროსი შალვა ბედოიძე.