ბათუმში სამარშრუტო მიკროავტობუსების მძღოლებმა გაფიცვა სამი დღით შეწყვიტეს. მემანქანეები მომდევნო დღეების განმავლობაში ჩვეულ რეჟიმში იმუშავებენ. ისინი ქალაქის მერთან, ლაშა კომახიძესთან შეხვედრას ელოდებიან, რომელიც მივლინებით აზერბაიჯანში იმყოფება.

"ვაჩერებთ აქციას. ხვალ დილიდან ქალაქში ჩვეულებრივად აღდგება მოძრაობა. ხვალ, ზეგ, მაზეგ, ველოდებით მერის ჩამოსვლას. ასე რომ, ჩვეულებრივად იმუშავებს ქალაქის ხაზი. მერი ჩამოვა, დაველაპარაკებით და კონკრეტულად გადავწყვეტთ ჩვენს სამოქმედო გეგმას", - განაცხადა სამარშრუტოს მძღოლმა, ზვიად დიასამიძემ აჭარის ტელევიზიასთან საუბრისას.

ბათუმსა და ხელვაჩაურში სამარშრუტო მიკროავტობუსის მძღოლები დღეს, 27 ივნისს, დილით გაიფიცნენ. მძღოლები საკრებულოს გადაწყვეტილებას აპროტესტებენ, რომლის თანახმადაც ბათუმში მიკროავტობუსების რაოდენობა უნდა განახევრდეს.

გაიგეთ მეტი: რასაც გვთხოვენ გლეხი ვერ დააკმაყოფილებს - რას აპროტესტებენ გაფიცული მძღოლები ბათუმში