თამაზ მეჭიაურის პარტიის წევრი სანდრო ბრეგაძისა და მისი თანხმლები პირების მხრიდან სამართალდამცველთა რეფორმირების ცენტრის ხელმძღვანელ ზვიად კუპრავაზე ფიზიკური და სიტყვიერი შეურაცხყოფის ფაქტს არასამთავრობო ორგანიზაციები ეხმაურებიან და შინაგან საქმეთა სამინისტროსა და სამართალდამცავ ორგანოებს რეაგირებისკენ მოუწოდებენ.

NGO-ები ეფექტიანი და გამჭვირვალე გამოძიების დაწყებას და მოძალადე პირების მყისიერად სისხლისსამართლის პასუხისგებაში მიცემას მოითხოვენ:

"მიგვაჩნია, რომ თავდასხმის დროს გაკეთებული განცხადებები სამართლიანად აჩენს საფუძლიან ეჭვს, რომ ფიზიკური ძალადობა მოტივირებული იყო დისკრიმინაციის ნიშნით, რაც ზვიად კუპრავას სამოქალაქო და პოლიტიკურ შეხედულებებს უკავშირდება".

არასამთავრობო ორგანიზაციები მიიჩნევენ, რომ განსკუთრებით შემაშფოთებელია ის ფაქტი, რომ ეს არაა წინასაარჩევნო პერიოდში ხელისუფლების მიმართ კრიტიკულად განწყობილ პირებზე ძალადობის პირველი შემთხვევა, მსგავს ფაქტებზე არასათანადო რეაგირება კი საფრთხეს უქმნის მშვიდობიან წინასაარჩევნო გარემოს და თავისუფალი და სამართლიანი არჩევნების ჩატარებას:

"2016 წლის საპარლამენტო არჩევნების სამართლიანად და არაძალადობრივ გარემოში ჩატარება მნიშვნელოვანი წინაპირობაა საქართველოს შემდგომი დემოკრატიული განვითარებისთვის".

განცხადებას ხელს აწერს:

  • საქართველოს დემოკრატიული ინიციატივა (GDI)
  • მედიის განვითარების ფონდი (MDF)
  • საქართველოს რეფორმების ასოციაცია (GRASS)
  • ადამიანის უფლებათა ცენტრი
  • კონსტიტუციის 42-ე მუხლი
  • ლგბტ საქართველო
  • ტოლერანტობის და მრავალფეროვნების ინსტიტუტი (TDI)