თუქეთის ელჩმა, ზექი ლევენთ გუმრუქჩუმ, თბილისში დღეს გამართულ პრესკონფერენციაზე თურქეთში მიმდინარე პროცესების დემოკრატიულობაზე ისაუბრა.

ელჩმა აღნიშნა, რომ ხშირად ისმება კითხვები თურქეთში მიმდინარე პროცესების არადემოკრატიულობაზე და არსებობს შიში, რომ მიმდინარე მოვლენები თურქეთში დემოკრატიული პროცესების საფრთხეს ქმნის:

"მე ამას ვაფასებ, როგორც შეურაცხყოფას. ასობით ადამიანმა დადო სიცოცხლე იმისთვის, რომ დაეცვა დემოკრატია 15 ივლისის ღამეს. ხალხმა თავისი ძალისხმევით დაიცვა დემოკრატიული პრინციპები და ამან უფრო გაამტკიცა თურქეთში დემოკრატიული პროცესები. თურქეთში ბოლო ათ დღეში მიღებული ზომები აბსოლუტურად თანხვედრაშია კონსტიტუციასთან, სამართლებრივ აქტებთან და თურქეთში არსებული ყველა პარტიის პოლიტიკურ ნებასთან."

ელჩმა აღნიშნა, რომ მიმდინარე პროცესებთან დაკავშირებით მთავრობის გადაწყვეტილებებს თანადგომას ოპოზიციური პარტიებიც უცხადებენ.

"რამდენიმე დღის წინ პირველად ოთხმა პარტიამ გააკეთა ერთობლივი დეკლარაცია, შემდეგ ორმა პარტიამ, გუშინ კიდევ ოთხმა პარტია გადაწყვიტა, რომ პარლამენტში შეიქმნას საგამოძიებო კომისია."

ელჩის განცხადებით, თურქეთის პრეზიდენტი, პრემიერი, მთავრობა სრულიად არის მობილიზებული პრობლემების აღმოსაფხვრელად და თურქეთი, ამ ეტაპზე, დემოკრატიული პროცესების ხელშეშლის საფრთხის წინაშე არ დგას.