ამერიკის შეერთებული შტატები გაეროს ადამიანის უფლებათა საბჭოს ტოვებს. აშშ-ს ელჩმა გაეროში, ნიკი ჰეილიმ სახელმწიფო დეპარტამენტში გამართულ ბრიფინგზე საბჭოს "ვიწრო ინტერესების დამცველი" უწოდა.

"უკვე დიდი ხანია ადამიანის უფლებათა საბჭო ადამიანის უფლებათა დამრღვევებს იცავს და პოლიტიკურად მიკერძოებულია", - ამბობს ნიკი ჰეილი.

მისივე თქმით, კონგოს დემოკრატიული რესპუბლიკის საბჭოში გაწევრიანება, ერთ-ერთი ბოლო იყო, ტრამპის ადმინისტრაციის გადაწყვეტილების მიღებისთვის:

"თუკი ეს შეიცვლება, აშშ მოხარული იქნება, რომ ისევ შეუერთდეს საბჭოს".

ნიკი ჰეილის ბრიფინგზე თან ახლდა სახელმწიფო მდივანი, მაიკ პომპეო, რომელმაც თქვა, რომ "საბჭო ადამიანის უფლებათა სუსტი დამცველია".

აშშ-ს განაცხადს გამოეხმაურა გაეროს გენერალური მდივანი, ანტონიო გუტიერესი, რომელმაც საკუთარ განცხადებაში აღნიშნა, რომ ბევრად უფრო სასურველია შტატები დარჩეს საბჭოს წევრად. გაეროს ადამიანის უფლებათა დაცვის კომისრის, ზეიდ რაად ჰუსეინის თქმით კი აშშ-ს გადაწყვეტილება მისთვის იმედგაცრუებაა, თუმცა არა მოულოდნელი:

"თუკი ადამიანის უფლებათა დღევანდელ მდგომარეობას შევხედავთ, აშშ-მ წინ უნდა გადადგას ნაბიჯი, არათუ უკან დაიხიოს".

2006 წელს აშშ-მ უარი თქვა საბჭოში გაწევრიანებაზე და მხოლოდ 2009 წელს, ბარაკ ობამას მმართველობის დროს გაერთიანდა. 2013 წელს საბჭოს წევრად აირჩიეს ჩინეთი, რუსეთი, საუდის არაბეთი, ალჟირი და ვიეტნამი.

გაერომ საბჭო 2006 წელს დააარსა, რითაც გაეროს ადამიანის უფლებათა კომისია ჩაანაცვლა. საბჭო კრიტიკის საგანი გახდა მას შემდეგ რაც გაწევრიანების საშუალება მიეცათ ისევ ქვეყნებს, სადაც ადამიანის უფლებები ნაკლებად არის დაცული. იგი 47 წევრი სახელმწიფოსაგან შედგება და მდებარეობს ჟენევაში. ადამიანის უფლებათა საბჭო წარმოადგენს გაეროს მთავრობათაშორის ორგანოს, რომელიც პასუხისმგებელია მსოფლიოში ადამიანის უფლებათა დაცვასა და ხელშეწყობაზე. საბჭო განიხილავს ადამიანის უფლებათა დარღვევებს და შეიმუშავებს რეკომენდაციებს.