გამომძიებელი რეპორტიორის მიერ მომზადებული ფილმი "სისხლში მოსვრილი ბიჭები ხორავას ქუჩიდან" საზოგადოებრივი მაუწყებელი ეთერში ხვალ, 19 ივნისს, 12:15 საათზე გავა. ინფორმაციას პირველი არხი ავრცელებს.

პირველი არხის აღმასრულებელი საბჭოს განცხადებით, გავრცელებული ინფორმაცია იმის შესახებ, რომ ფილმის ჩვენება არხმა დაბლოკა "აბსურდია." მათი თქმით, ფილმი არ აკმაყოფილებდა ჟურნალისტური საქმიანობის სტანდარტებს და მაუწყებელთა ქცევის კოდექსს, ამდენად პირველი არხის მენეჯმენტს მიაჩნდა, რომ მასზე მუშაობა უნდა გაგრძელებულიყო.

საბჭოს განცხადებით, ფილმი გადაეგზავნა საპარლამენტო საგამოძიებო კომისიას, სახალხო დამცველს, არასამთავრობო ორგანიზაციებს და მაუწყებლის სამერვეო საბჭოს. მათივე თქმით, საპარლამენტო კომისიისგან და არასამთავრობოებისგან მიიღეს დასტური, რომ ფილმის გაშვება ძიებას ხელს არ შეუშლიდა:

"სწორედ, ამ გარემოებების გათვალისწინებით, რათა შვილმკვდარ მამას არ ქონდეს განცდა, რომ მისი შვილის მკვლელობის შესახებ საზოგადოებრივი მაუწყებელი რაიმე ინფორმაციას მალავს, ამასთანავე, არ გაგრძელდეს სხვადასხვაგვარი სპეკულაციებით საზოგადოებრივი აზრის შეცდომაში შეყვანა, პირველი არხის ხელმძღვანელობამ გადაწყვეტილება მიიღო, ხვალ 19 ივნისს, 12:15 საათზე, მოამბის საინფორმაციო გამოშვების შემდეგ გაუშვას ეს ფილმი",- აღნიშნულია პირველი არხის აღმასრულებელი საბჭოს განცხადებაში.

ხორავას ქუჩაზე მოკლულის მამა, ზაზა სარალიძე აცხადებდა, რომ პირველი არხი ფილმს ეთერში პოლიტიკური მოტივებით არ უშვებდა. მისი თქმით, მთავრობა ცდილობდა ხელი შეეშალა მკვლელობაზე ინფორმაციის გავრცელებისთვის. სარალიძემ არაერთხელ მიმართა მაუწყებლის საბჭოს დაუყოვნებლივი რეაგირების მოთხოვნით.