საქართველოს პრემიერ-მინისტრობის კანდიდატის, მამუკა ბახტაძის განცხადებით, მთავრობა პარლამენტში ნდობის გამოსაცხადებლად არსებული შემადგენლობით წარდგება.

მისი განმარტებით, სამთავრობო ცვლილებები მას შემდეგ განხორციელდება, რაც მთავრობის შემადგენლობაში სტრუქტურული ცვლილებები შევა და კანონის დონეზე დამტკიცდება. მამუკა ბახტაძემ დააანონსა, რომ სამინისტროების რაოდენობა 14-დან 11-მდე შემცირდება.

პრემიერ-მინისტრობის კანდიდატის განმარტებით, მსგავსი გადაწყვეტილების მიზეზი ის ვადებია, რომლის ფარგლებშიც კონსტიტუციურად ახალი მთავრობა უნდა დამტკიცდეს. ბახტაძის თქმით, 7 დღის ვადაში, მთავრობაში სტრუქტურული ცვლილებების შესახებ საკანონმდებლო ინიციატივა ვერ მომზადდება და სამი მოსმენით დამტკიცებაც ვერ მოესწრება. შესაბამისად, მმართველმა გუნდმა მიიღო გადაწყვეტილება, რომ პარლამენტი ნდობას მთავრობის არსებულ შემადგენლობას კვირის ბოლომდე გამოუცხადებს, შემდგომ მომზადდება საკანონდებლო ცვლილებები, სამინისტროების შემცირების მიზნით და ამის შემდგომ პრემიერ-მინისტრი სამთავრობო ცვლილებებს განახორციელებს.

მამუკა ბახტაძემ ჟურნალისტებს "პირობა მისცა", რომ ახალ მთავრობაში ახალი სახეები იქნებიან. პრემიერ-მინისტრობის კანდიდატმა 18 ივნისის ბრიფინგამდე დაადასტურა, რომ ის რამდენიმე უწყების გაერთიანებას გეგმავდა და ამ საკითხზე აქტიური კონსულტაციები მიმდინარეობდა. პრიორიტეტად პრემიერ-მინისტრობის კანდიდატმა მცირე ზომის, მაგრამ ოპერატიული და მოქნილი მთავრობა დაასახელა.

მთავრობის არსებულ მინისტრთა კაბინეტს მამუკა ბახტაძე ახლა საქართველოს პარლამენტს წარუდგენს განსახილველად. ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. კანონმდებლების თქმით, მთავრობა კვირის ბოლომდე დამტკიცდება.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.