შინაგან საქმეთა სამინისტრო განცხადებით, ბოლო პერიოდში ე.წ. ქურდული სამყაროს წევრობის ბრალდებით დაკავებულია 6 პირი. ამის შესახებ ორგანიზებულ დანაშაულთან ბრძოლის სამმართველოს უფროსმა, მამუკა ჭელიძემ დღეს, 18 ივნისს ბრიფინგზე ისაუბრა.

მისი თქმით, ზესტაფონში, ე.წ. ქურდული სამყაროს წევრობის ბრალდებით, დაკავებულები არიან კრიმინალური ავტორიტეტები, მათ შორის წარსულში ნასამართლევი მ.ბ. (მეტსახელად "ბახა-ბახა").

შსს-ს ცნობით, ისინი მონაწილეობას იღებდნენ "ქურდულ გარჩევებში" და აქტიური კავშირი ჰქონდათ უცხოეთში მყოფ ქართველ ე.წ. კანონიერ ქურდთან - ფრიდონ სულაქველიძესთან (მეტსახელად "პაწუა") და მის ძმასთან - ხვიჩა სულაქველიძესთან, რომლებისგანაც დავალებებს იღებდნენ და ე.წ. ქურდული სამყაროს მიერ დადგენილი წესებით მოქმედებდნენ.

"ბრალდებულები ზესტაფონში მდებარე ერთ-ერთი კაფეს მფლობელისგან, ე.წ. კანონიერი ქურდის" - ფრიდონ სულაქველიძის მიერ მისი სამეწარმეო საქმიანობის მფარველობის სანაცვლოდ, მუქარითა და ქურდული გარჩევის გზით, ყოველთვიურად მოგების 30 პროცენტის გადახდას მოითხოვდნენ", - ნათქვამია შსს-ს განცხადებაში.

ხვიჩა სულაქველიძის ადგილსამყოფელის დადგენის და დაკავების მიზნით, ტარდება ოპერატიულ-სამძებრო და საგამოძიებო ღონისძიებები.

გამოძიება მიმდინარეობს საქართველოს სსკ-ს 223-ე პრიმა მუხლის 1-ლი ნაწილით, რაც ე.წ. ქურდული სამყაროს წევრობას გულისხმობს.

ე.წ. ქურდული სამყაროს წევრობის ბრალდებით დაკავებულია წარსულში სხვადასხვა მძიმე დანაშაულისთვის ნასამართლევი 2 პირი:

ე.წ. კრიმინალური ავტორიტეტები - 1980 წელს დაბადებული ბ.ბ. და 1981 წელს დაბადებული, ჯ.ო. დააკავეს.

გამოძიების ვერსიით, მათ უცხოეთში მყოფ ე.წ. კანონიერ ქურდთან - ნადირ სალიფოვთან (მეტსახელად "გული") შეთანხმებით, მოქალაქეს "ქურდული გარჩევა" მოუწყეს და დიდი ოდენობით თანხას სძალავდნენ.

გამოძიების ინფორმაციით, ბრალდებულები მონაწილეობას იღებდნენ "ქურდულ გარჩევებში" და ე.წ. ქურდული სამყაროს მიერ დადგენილი წესებით მოქმედებდნენ.

16 ივნისს სამართალდამცავებმა თბილისის საერთაშორისო აეროპორტში "ქურდული სამყაროს" წევრი, 1962 წელს დაბადებული გ.ე. დააკავეს.

დაკავებული სამართალდამცველების მიერ სისხლის სამართლის კოდექსის 223 პრიმა მუხლის პირველი ნაწილით 2007 წლიდან იძებნებოდა, რაც „ქურდული სამყაროს“ წევრობას გულისხმობს და 7-დან 10 წლამდე ვადით თავისუფლების აღკვეთას ითვალისწინებს.

გამოძიების თანახმად, მას მჭიდრო კავშირი ჰქონდა საზღვარგარეთ მყოფ ე.წ. კანონიერ ქურდთან" - ზაზა ელიკაშვილთან და ე.წ. ქურდული სამყაროს სხვა წარმომადგენლებთან: ოთარ ელიზბარაშვილთან (მეტსახელად "ჭაღარა"), გიორგი ახალმოსულიშვილთან (მეტსახელად "ბურვაკა"), ნოდარ გიორგაძესთან (მეტსახელად "ოდო"), ბესიკ ჭანყოშვილთან (მეტსახელად "დრელე").