უმრავლესობის დეპუტატი გია გაჩეჩილაძე მიიჩნევს, რომ თეა წულუკიანი იუსტიციის მინისტრად უნდა დარჩეს.

დეპუტატის განმარტებით, წულუკიანს ჰააგაში სერიოზული პროცესი, რუსეთ-საქართველოს ომის გამოძიების საქმე აქვს დაწყებული, რომელიც ბოლომდე უნდა დაასრულოს.

ქართული ოცნების ცენტრალურ ოფისში პრემიერ-მინისტრობის კანდიდატი მამუკა ბახტაძე უმრავლესობის წევრებს შეხვდება. ბახტაძემ პარტიის წევრებს მინისტრთა კაბინეტის ახალი შემადგენლობა უნდა გააცნოს.

პრემიერ-მინისტრობის კანდიდატმა მამუკა ბახტაძემ დაადასტურა, რომ ის რამდენიმე უწყების გაერთიანებას გეგმავს და ამ საკითხზე აქტიური კონსულტაციები მიმდინარეობს. პრიორიტეტად პრემიერ-მინისტრობის კანდიდატმა მცირე ზომის, მაგრამ ოპერატიული და მოქნილი მთავრობა დაასახელა.

მინისტრთა კაბინეტის ახალი შემადგენლობის დასახელების შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.