ოზურგეთის საკრებულოს ნაციონალური მოძრაობის წევრი, ბესო ქათამაძე აცხადებს, რომ ქართული ოცნების წევრებმა სცემეს. როგორც On.ge-ს ენმ-ის ოზურგეთის ორგანიზაციის თავმჯდომარემ, დავით მჟავანაძემ განუცხადა, ქათამაძეზე ფეისბუქპოსტების გამო ფიზიკურად იძალადეს.

"ქურდული და კრიმინალური გარჩევა მოუწყვეს. ბესოს არ ქონდა ინფორმაცია, მას უთხრეს, რომ უნდა ესაუბრათ და როდესაც შევიდა ქართული ოცნების ოთახში, მასზე დაიწყეს ფიზიკური ანგარიშსწორება. სახეზეა წინასწარ დაგეგმილი ჯგუფური დანაშაული",- განაცხადა მჟავანაძემ.

მისივე თქმით, ქათამაძეს ბლაგვი საგნებით შეიარაღებული პირები სცემდნენ და რკინის საგანს ურტყამდნენ თავში.

როგორც შინაგან საქმეთა სამინისტროში On.ge-ს განუცხადეს, საქმეზე გამოძიება საქართველოს სისხლის სამართლის კოდექსის 126-ე მუხლის პირველი ნაწილით მიმდინარეობს, რაც ცემას ან სხვაგვარ ძალადობას გულისხმობს. მუხლი ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე, ან შინაპატიმრობით ვადით ექვსი თვიდან ერთ წლამდე, ანდა თავისუფლების აღკვეთით ვადით ერთ წლამდე.