საქართველოს პარლამენტის თავმჯდომარის, ირაკლი კობახიძის თქმით, პრეზიდენტის განცხადება პრემიერ-მინისტრის, გიორგი კვირიკაშვილის გადადგომაზე, არასერიოზული იყო.

მისი თქმით, გული სტკივა, რომ პრეზიდენტი ასეთ განცხადებებს აკეთებს.

"პრეზიდენტი იყო არასერიოზული თავის განცხადებაში. არასერიოზულ განცხადებებზე ბუნებრივია არ შეიძლება სერიოზული კომენტარის გაკეთება. მართლა გული მტკივა, როცა სახელმწიფოს მეთაური, რომელიც რაღაცების კონსტიტუციური გარანტია, მათ შორის კონსტიტუციური სისტემის, თუნდაც სიმბოლურად, მაგრამ მაინც, არ შეიძლება ასეთ განცხადებებს აკეთებდეს და მე არ მინდა დამატებითი კომენტარის გაკეთება", - განაცხადა ირაკლი კობახიძემ.

ბათუმში გამართულ ყოველწლიურ კონფერენციაზე პრეზიდენტმა გიორგი მაგველაშვილმა სიტყვით გამოსვლისას სამთავრობო ცვლილებებს დიდი დრო დაუთმო. მისი თქმით, პრემიერ-მინისტრის გადადგომა, რომელიც თავის საქმიანობას წარმატებულად აფასებს, კითხვის ნიშნებს აჩენს და მასკარადია. პრეზიდენტმა ქართულ ოცნებას მოუწოდა პრემიერად პარტიის ლიდერი ბიძინა ივანიშვილი დაასახელოს.

რა ხდება პრემიერ-მინისტრის გადადგომის შემდეგ

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა გუშინ, 13 ივნისს პრემიერ-მინისტრის თანამდებობა დატოვა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.

პრემიერ-მინისტრის გადადგომის შემდეგ, საქართველოს კონსტიტუციის მიხედვით, პრეზიდენტმა არსებულ მთავრობას დააკისრა ვალდებულება ახალი მთავრობის არჩევამდე თავისი მოვალეობა შეასრულოს. ამის შემდეგ, შვიდი დღის განმავლობაში, საპარლამენტო უმრავლესობამ პრეზიდენტს პრემიერ-მინისტრობის კანდიდატი უნდა შესთავაზოს, რომელსაც იგი უკვე პარლამენტს წარუდგენს განსახილველად. პრემიერ-მინისტრის კანდიდატი 14 ივნისს უმრავლესობის გაფართოებულ სხდომაზე გახდება ცნობილი.

ასევე შვიდდღიან ვადაში პრემიერ-მინისტრობის კანდიდატმა უნდა ჩამოაყალიბოს მთავრობის შემადგენლობა და პარლამენტს ნდობის მისაღებად უნდა წარუდგინოს. მან ასევე უნდა წარადგინოს სამთავრობო პროგრამაც.

ამის შემდეგ, კიდევ შვიდი დღის განმავლობაში, პარლამენტმა ეს ყველაფერი უნდა განიხილოს და კენჭი უყაროს. მაქსიმუმ 21 დღეში ახალი მთავრობა უნდა დაკომპლექტეს