საერთაშორისო გამჭვირვალობა - საქართველო საქართველოს იუსტიციის მინისტრის, თეა წულუკიანის ინტერვიუს აფასებს. ორგანიზაციაში ამბობენ, რომ მინისტრმა 10 ივნისს, იმედის ეთერში 7 ტყუილი გააჟღერა.

On.ge გთავაზობთ საერთაშორისო გამჭვირვალობა - საქართველოს მიერ გავრცელებულ ინფორმაციას უცვლელი სახით:

ტყუილი #1:

შინაგან საქმეთა სამინისტრომ ხორავას ქუჩაზე მომხდარი ტრაგედიის პირველივე დღიდან ძალიან მნიშვნელოვანი სამუშაო გასწია.

პასუხი:

2017 წლის დეკემბერში შს მინისტრი ამბობდა, რომ დანაშაულის ყველა მონაწილე დადგენილი და დაკავებული იყო, თუმცა შემდგომმა მოვლენებმა დაადასტურა, რომ საქმესთან დაკავშირებული ყველა პირი გამოვლენილი არ იყო.

სახალხო დამცველის შეფასებით, პირველივე დღეებიდან საგამოძიებო მოქმედებები ჩატარდა დაგვიანებით ან საერთოდ არ ჩატარებულა.

ტყუილი #2:

პროკურატურამ ყველაფერი გააკეთა, რომ მყარი მტკიცებულებები მიეწოდებინა სასამართლოსთვის.

პასუხი:

პროკურატურამ 30 მაისის განმარტა, რომ მირზა სუბელიანმა არაფერი იცოდა საქმის შესახებ.

რამდენიმე დღეში, 9 ივნისს ის დანაშაულის შეუტყობინებლობისთვის დააკავეს.

ტყუილი #3:

დღეს ჩვენს ქვეყანაში მოსამართლე არის დამოუკიდებელი.

პასუხი:

უკანასკნელ წლებში ევროკავშირისა და აშშ-ის ელჩების განცხადებები, ავტორიტეტული ორგანიზაციების - Human Rights Watch-ისა და Freedom House-ის ანგარიშები მიუთითებს სასამართლოში არსებულ პრობლემებზე, კორუფციის რისკებსა და გარე ჩარევებზე.
ამერიკის სახელმწიფო დეპარტამენტის 2017 წლის ანგარიშის მიხედვით, "მოსამართლეები მოწყვლადი იყვნენ პოლიტიკური ზეწოლის წინაშე, როგორც მართლმსაჯულების სისტემის შიგნით, ისე მის გარეთ."

ტყუილი #4:

"ბევრი ყიჟინი ისმის სასამართლოს რეფორმების ჩავარდნის თემაზე. ბევრჯერ ვთქვი, მე მგონია, რომ ეს ცნებების აღრევის ბრალია."

პასუხი:

თეა წულუკიანის გაჭიანურებული და ხარვეზიანი რეფორმების შედეგად:

1. არ გამოსწორდა მოსამართლეთა დანიშვნის წესი, შედეგად კი თანამდებობაზე გადაინიშნენ ისეთი მოსამართლეები, რომლებიც წინა ხელისუფლების დროს მთავრობის დავალებების შემსრულებლებად ითვლებოდნენ. მაგალითად, ლევან მურუსიძე, მიხეილ ჩინჩალაძე, მანუჩარ კაპანაძე და სხვები, რომელთა სახელებიც გირგვლიანის, თეთრაძის, მოლაშვილის და მსგავს გახმაურებულ საქმეებს უკავშირდება.
2. წულუკიანი „მესამე ტალღის” რეფორმის პროცესში ლევან მურუსიძესა და სხვა გავლენიან მოსამართლეებთან დათმობებზე წავიდა, რამაც დააზიანა რეფორმა და სისტემაში კლანური მმართველობა გააძლიერა.

ტყუილი #5:

"ჩემი აზრი თუ გაინტერესებთ, მე ბატონი მურუსიძე არ მომწონს".

პასუხი:

1. "მესამე ტალღის" რეფორმაზე მუშაობისას თეა წულუკიანი დახურულ კარს მიღმა შეხვდა ლევან მურუსიძეს და მისი მოთხოვნები გაითვალისწინა. შედეგად, მაგ., სასამართლოს თავმჯდომარეების დანიშვნა კვლავ მოსამართლეთა გავლენიანი ჯგუფის ხელში დარჩა. უზენაესი სასამართლოს თავმჯდომარე სპეციალურად გამოთიშეს პროცესებიდან - მინისტრი სასამართლო კორპუსს ნინო გვენეტაძის გარეშე ხვდებოდა.
2. თეა წულუკიანის თავმჯდომარეობით შექმნილმა კომისიამ სტრასბურგში მოსამართლის ვაკანსიაზე მხარი დაუჭირა ევა გოცირიძეს, რომელიც მანამდე ლევან მურუსიძის გადანიშვნას მიემხრო.

ტყუილი #6:

მოსამართლეთა 3-წლიანი გამოსაცდელი ვადის კრიტიკის გამო, თეა წულუკიანმა სასამართლოში წარუმატებელ საკადრო ცვლილებებზე პასუხისმგებლობა არასამთავრობო ორგანიზაციებსა და უცხოელ კოლეგებს დააკისრა.

პასუხი:

მოსამართლის გამოსაცდელი ვადით დანიშვნა, რომელსაც თეა წულუკიანი აქტიურად უჭერდა მხარს, ვენეციის კომისიამ მოსამართლის დამოუკიდებლობისთვის საფრთხედ შეაფასა. ვენეციის კომისიის მოსაზრებას იზიარებდა სამოქალაქო სექტორიც. საბოლოოდ, 2017 წელს გამოსაცდელი ვადით დანიშვნა არაკონსტიტუციურად იქნა ცნობილი.

ტყუილი #7:

თეა წულუკიანის განცხადებით, მის გადადგომას არასამთავრობო ორგანიზაციების მხოლოდ მცირე ნაწილი ითხოვს.

პასუხი:

იუსტიციის მინისტრის გადადგომის მოთხოვნით თითქმის ყველა ის არასამთავრობო ორგანიზაცია გამოვიდა, ვინც მართლმსაჯულების თემებზე აქტიურად მუშაობს და წლებია ეფექტურ რეფორმებს ითხოვს.