მალხაზ მაჩალიკაშვილი მოითხოვს, რომ მისი შვილის თემირლან მაჩალიკაშვილის საქმე, ხორავას ქუჩის საქმესთან ერთად, პარლამენტში შექმნილ საგამოძიებო კომისიის ფორმატში განიხილონ.

მისი თქმით, დაპირდნენ, რომ თემირლან მაჩალიკაშვილის საქმე საგამოძიებო კომისიის ფარგლებში გამოიძიებდნენ, თუმცა ასე არ მოხდა.

"აღიაროს სახელმწიფომ თავისი შეცდომა და დასაჯონ ის ხალხი, ვინც ჩემს ოჯახში ტერაქტი მოაწყო და ტერორისტად შერაცხა ჩემი შვილი", - განუცხადა მალხაზ მაჩალიკაშვილმა ჟურნალისტებს.

6 მაისს პარლამენტის რიგგარეშე სხდომაზე, ხორავას ქუჩაზე მომხდარი ორი ახალგაზრდის მკვლელობის საქმის შემსწავლელი დროებით საგამოძიებო კომისია დაამტკიცეს. კომისიის არჩევას 95-მა დეპუტატმა დაუჭირა მხარი, წინააღმდეგი 1 იყო.

კომისიის შემადგენლობა 17 წევრით განისაზღვრა. უმრავლესობასა და უმცირესობას შორის შეთანხმებით, კვოტების მიხედვით, 9 ადგილი კომისიაში ეკუთვნის უმცირესობას - ევროპულ საქართველოს თავისი ფრაქციებით, ერთი ეკუთვნის პატრიოტთა ალიანსს. კომისიის შემადგენლობაში არ იქნება ერთიანი ნაციონალური მოძრაობა. კომისიას სერგი კაპანაძე უხელმძღვანელებს.