შინაგან საქმეთა სამინისტროს განცხადებით, 31 მაისს, თბილისში, აღმაშენებლის გამზირზე მომხდარი დაპირისპირების შედეგად 1985 წელს დაბადებული პირი ცეცხლსასროლი იარაღის უკანონო შეძენა-შენახვა-ტარების ბრალდებით დააკავეს. უწყების ცნობით, პოლიციელები დაპირისპირების განმუხტვას ცდილობდნენ, რა დროსაც ერთმა პირმა ცეცხლსასროლი იარაღიდან გაისროლა.

შსს-ს ინფორმაციით, ინციდენტში მონაწილე პირების ერთი ნაწილი მიიმალა.

31 მაისს, გვიან ღამით, ძიუდოისტებს შორის დაპირისპირება სისხლიან გარჩევაში გადაიზარდა. რადიო თავისუფლების ცნობით, ძიუდოს ფედერაციის პრეზიდენტის გადადგომის მომთხოვნ სპორტსმენებს ცეცხლი გაუხსნეს ფედერაციის თანამშრომლებმა.

ფიზიკური დაპირისპირებისას დაშავდა ორი პირი, რაზეც გამოძიება საქართველოს სისხლის სამართლის კოდექსის 126-ე, ძალადობას მუხლით დაიწყო. შსს-ს ცნობით, შემთხვევის ადგილის დათვალიერებისას, ტე-ტე-ს ტიპის ცეცხლსასროლი იარაღი ამოიღეს, რომელიც გადაგზავნილია შესაბამის ექსპერტიზაზე.

ასევე, დავით აღმაშენებლის გამზირიდან გადაუდებელი ქირურგიისა და ტრავმატოლოგიის ცენტრში 1983 წელს დაბადებული პირი მიიყვანეს, რომელსაც, სავარაუდოდ, ცეცხლსასროლი იარაღიდან გასროლით მიყენებული ჭრილობა აღენიშნებოდა. გამოძიება საქართველოს სსკ-ს 118-ე მუხლით მიმდინარეობს, რაც ჯანმრთელობის განზრახ ნაკლებად მძიმე დაზიანებას გულისხმობს.