პარლამენტთან საპროტესტო აქცია გრძელდება. აქციის ორგანიზატორები ყველა იმ პირის დასჯას ითხოვენ, რომლები, მათი აზრით, ხორავას ქუჩის საქმის ფალსიფიცირებაში მონაწილეობდნენ.

მათივე თქმით, მთავარი პროკურორის ირაკლი შოთაძის გადადგომა არაფერს ნიშნავს.

"ჩამოსაგდებია ყველა აგური, რომელიც ამ ძალადობრივი სისტემის შემადგენელია", - განაცხადა ზვიად კუპრავამ.

კუპრავას განცხადებით, უნდა გადადგეს უზენაესი სასამართლოს თავმჯდომარე ნინო გვენეტაძე, მოსამართლე ლევან მურუსიძე და იუსტიციის უმაღლესი საბჭოს წევრი მიხეილ ჩინჩალაძე. მან, ასევე, მოითხოვა სუს-ის უფროსის, ვახტანგ გომელაურის გადაყენება.

დღეს, 31 მაისს ე.წ. ხორავას ქუჩის საქმეზე სასმართლო გადაწყვეტილების გამოცხადების შემდეგ პროკურატურასთან აქცია დაიგეგმა.

თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა. დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.